दार्चुला जीप दुर्घटना अपडेट : मृतक ५ जनाको सनाखत, घाइते ३ जनाको परिचय अझै खुलेन

धनगढी- दार्चुला जीप दुर्घटनामा मृत्यु हुने पाँचै जनाको परिचय खुलेको छ। मृतक पाँचै जना बझाङको बुंगल नगरपालिका वडा नम्बर ८ का बासिन्दा भएको प्रहरीले जनाएको छ। उनीहरू रोजगारीका लागि दार्चुला हुँदै भारत जान लागेको प्रहरीले जनाएको छ। 

ईलाका प्रहरी कार्यालय गोकुलेश्वरका अनुसार दुर्घटनामा बुंगल नगरपालिका वडा नम्बर-८ का हिक्मत जाग्री, पुने बोहरा, उजाले बोहरा, रैभान बोहरा र चम्पादेवी बोहरा हुन।पाँचै जना गोकुलेश्वर बजारबाट जीपमा सवार भएको प्रहरीले जनाएको छ।

दुर्घटनामा घाइते ६ जनाको पनि परिचय खुलेको छ। तीन जना गम्भीर घाइतेको भने अझै परिचय खुल्न सकेको छैन। घाइते पाँच जना मालिकार्जुन गाउँपालिका र एक जना महाकाली नगरपालिकाका रहेका छन्। 

उनीहरुको गोकुलेश्वरस्थित अस्पतालमा उपचार भइरहेको छ। प्रहरीका अनुसार मालिकार्जुन गाउँपालिका-३ की ५० वर्षीया गोमती देवी धामी, ३० वर्षीया गोमती धामी, २१ वर्षीय सुमनसिंह धामी, ४२ वर्षीया रुपा धामी र सोही गाउँपालिका वडा नं . ६ की ४० वर्षीया रेवती धामी र महाकाली नगरपालिका-३ का ३५ वर्षीय रमेश लुहार घाइते छन्। उनीहरुको अवस्था चिन्तामुक्त रहेको छ। हातखुट्टामा चोट लागेको छ।

शैल्यशिखर नगरपालिका-६ उल्लानीमा से १ ज ५५१ नम्बरको जीप दुर्घटना भएको थियो। जीपको अगाडिको टायर फुत्किँदा दुर्घटना भएको अनुमान गरिएको छ। जीप सडकबाट करिब अढाई सय मिटर तल भीरमा खसेको बताइएको छ।