कांग्रेस नेता लेखकले भने - अब ५ वर्षभित्र दोधारामा सुक्खा बन्दरगाह बन्छ, तटबन्धनको काम सुरु भइसक्यो

काठमाडौं- नेपाली कांग्रेसका केन्द्रीय सदस्य रमेश लेखकले दोधरा चाँदनीमा आगामी पाँच वर्षभित्र सुक्खा बन्दरगाह निर्माण हुने बताएका छन्।

नेता लेखकले दोधारा चाँदनी नगरपालिकामा भएको एक कार्यक्रममा नेता लेखकले भने, 'नेपाली कांग्रेसको सरकारले सुक्खा बन्दरगाह निर्माणको प्रक्रिया अगाडि बढाएकोमा ०७४ सालको निर्वाचनमा कञ्‍चनपुर -३ मा कांग्रेस पराजित भएपछि प्रक्रिया अगाडि नबढेको हुँदा आगामी निर्वाचनमा नेपाली कांग्रेसलाई विजयी गराएमा आगामी ५ वर्षभित्र सुक्खा बन्दरगाह निर्माण सम्पन्‍न हुनेछ।'

सुक्खा बन्दरगाह निर्माण भएपछि हजारौ बिरोजगारहरुले रोजगारी पाउने पनि उनले बताएका छन्। नेता लेखकले दोधरा चाँदनीमा डुबानको समस्या समाधान गर्न महाकाली नदी र जोगबुढा नदीमा तटबन्ध निर्माण प्रक्रियालाई नेपाली कांग्रेसको सरकारले अगाडि बढाएकोमा ०७४ सालपछि नेकपा एमालेको सरकार बन्दा तटबन्ध निर्माणको काम पनि काम रोकिएको बताए। 

१ वर्षअगाडि नेपाली कांग्रेसको नेतृत्वमा सरकार बनेपछी पुनः तटबन्ध निर्माणको प्रक्रिया अगाडि बढेको उनले जानकारी गराए। भने, 'वर्तमान सरकारले नदी नियन्त्रणका लागि महाकाली नदिमा  तटबन्ध निर्माण गर्न २४ करोड र जोगबुढा नदीमा तटबन्ध निर्माणका लागि १२ करोडको ठेक्का गरी काम अगाडि बढाइसकेको छ।'

पाँच वर्ष भित्र महाकाली र जोगबुढा नदीमा तटबन्ध निर्माण गरी दोधरा चादनीको डुबानको समस्या समाधान हुने पनि उनले बताए। नेता लेखकले १ महिनादेखि भीमदत्त र दोधरा चाँदनी नगरपालिकाका टोल-टोलमा भेटघाट तथा छलफल कार्यक्रमलाई तीव्रता दिएको नेता लेखकका स्वकिय सचिब जनक भट्टले जानकारी दिए।

नेता लेखक २०७४ को निर्वाचनमा नेकपा एमालेबाट दिपकप्रकाश भट्टसँग झिनो मतान्तरले पराजित भएका थिए। पराजित हुँदा पनि उनी आफ्नो निर्वाचन क्षेत्रको विकासका लागि लगातार खटिएका थिए। कोरोना महामारीको समयमा पनि नेता लेखकले स्थानीयहरुलाई राहत तथा सहयोग गरेका थिए।