प्रधानमन्त्रीलाई भन्दा वडाध्यक्षलाई बढी अधिकार : मुख्यमन्त्री पाण्डे

काभ्रे– बागमती प्रदेशका मुख्यमन्त्री राजेन्द्रप्रसाद पाण्डेले संघीयतामा वडाध्यक्षलाई प्रधानमन्त्रीभन्दा बढी अधिकार दिइएको बताएका छन्। बुधबार जिल्ला समन्वय समिति काभ्रेको छैटौं जिल्ला सभालाई सम्बोधन गर्दै उनले यस्तो बताएका हुन्। 

संविधानले वडाध्यक्षलाई ३७ वटासम्म अधिकार दिएको उनको भनाइ छ। ‘वडालाई सबैभन्दा बढी बलियो बनाउनुपर्छ भन्ने मान्यताबमोजिम वडाध्यक्षलाई प्रधानमन्त्रीभन्दा बढी अधिकार दिइएको छ। वडाध्यक्ष नभई कुनै काम अघि बढ्न सक्दैन,’ उनले भने। 

कार्यक्रममा सहभागी नगरप्रमुख तथा गाउँपालिका अध्यक्षले भने स्थानीय तहलाई कमजोर बनाइएको गुनासो गरेका थिए। ७५३ स्थानीय तहमा रहेका ६,७४३ वडालाई बलियो बनाउन सके देश विकास स्वतः हुने उनको दाबी छ।

मुख्यमन्त्री पाण्डेले संघीयता लागू भएको पाँच वर्ष पूरा नहुँदै यो ठीक भएन, यसले केही काम गरेन भनेर विरोधमा छलफल चलाउनुको कुनै औचित्य नहुने बताए।कार्यक्रममा संघीय सांसद गंगाबहादुर दोङ, नवीना लामा, संविधानसभा सदस्य तीर्थ लामा, रामहरि सुवेदीलगायतले संघीयतामा स्थानीय तहको भूमिकाबारे बोलेका थिए।