पत्रकार पोखरेलको बुटवलमा अन्त्येष्टि

बुटवल– पञ्चायतकालबाटै पत्रकारितामा सक्रिय प्रेस स्वतन्त्रता सेनानी वरिष्ठ पत्रकार वसन्त पोखरेलको ६८ वर्षको उमेरमा निधन भएको छ। मंगलबार बिहान निधन भएका पोखरेलको नेपाल पत्रकार महासंघको झन्डा ओढाएर अन्त्येष्टि गरिएको छ।

नेपाल पत्रकार महासंघ रुपन्देहीका पूर्व उपाध्यक्ष समेत रहेका पोखरेलको हिन्दू परम्पराअनुसार बुटवल २ मैनाबगरमा अन्त्येष्टि गरिएको हो। पत्रकार महासंघ रुपन्देहीले झन्डा ओढाएर श्रद्धाञ्जदी दिएको छ। श्रद्धाञ्जलीसभामा लुम्बिनी प्रदेशका आर्थिक मामिला तथा सहकारी मन्त्री कृष्णध्वज खड्का, नेपाल पत्रकार महासंघ रुपन्देहीका पूर्व अध्यक्षहरु बालकृष्ण चापागाई, विनोद पहाडी, डिआर घिमिरे, मोहन चापागाई, निवर्तमान अध्यक्ष यानेन्द्र जिसि, महासंघ लुम्बिनीका महासचिव विक्रम खड्का, विभिन्न पत्रकार सम्बद्ध संस्थाका प्रतिनिधि, पत्रकार, राजनीतज्ञ एवं उद्योगी व्यवसायीहरुको उपस्थिती थियो ।

श्रद्धाञ्जली सभामा बोल्दै नेपाल पत्रकार महासंघ रुपन्देहीका अध्यक्ष रामराज पोख्रेलले रुपन्देहीले एकजना कर्मठ, इमान्दार र निडर पत्रकार गुमाएको बताए। उनले पोखरेलले चार दशकभन्दा बढी सक्रिय पत्रकारिता गरेको बताए। महासंघ रुपन्देहीका पूर्व अध्यक्ष डिआर घिमिरेले जीवनी प्रस्तुत गर्दै पत्रकारिताको एउटा धरोहर ढलेको बताए।

पोखरेल २०३२ सालबाटै लेखन कार्यमा सक्रिय भएको र २०३५ सालबाट विभिन्न विचारमूलक पत्रपत्रिकामा काम गर्न थालेका हुन्। पत्रकारिताकै शिलशिलामा २०५८ सालमा प्रहरी हिरासतमा समेत बस्नुपरेको थियो।

विचार, लुम्बिनी दूत, दैनिक निर्णय, जनादेश, दैनिक लुम्बिनी, भावना दैनिक, दैनिकपत्र, जनसंघर्ष हुँदै हाल बुटवल टुडेको सल्लाहकार सम्पादकका रुपमा कार्यरत थिए। पोखरेलको २ छोरा, एक छोरी र श्रीमती छन्। पोखरेलको निधनप्रति नेपाल पत्रकार महासंघ रुपन्देही सहित विभिन्न पत्रकार सम्बद्ध संस्थाहरुले श्रद्धाञ्जली दिएका छन्।