काठमाडौं– म्यानचेस्टर युनाइटेका फर्वाड क्रिस्टियानो रोनाल्डोले युनाइटेड छाड्ने बताएका छन्। उनका एजेन्ट जर्ज मेन्डेजले अन्य क्लबको खोजी भइरहेको बताएका हुन्।
मेन्डेजले सरुवा बजारको अन्तिम समयमा रोनाल्डोलाई अन्य क्लबमा लैजाने विषयमा लागिरहेको अन्तर्राष्ट्रिय सञ्चारमाध्यममा बताएका छन्। रोनाल्डोको युनाइटेडमा अझै एक वर्ष सम्झौता बाँकी रहे पनि युनाइटेड छाड्ने तयारी गरेका हुन्। रोनाल्डो सिजन सुरु हुनुअघि नै क्लब छाड्न चाहन्थे। तर अझै पनि युनाइटेडले भने रोनाल्डोलाई नबेच्ने बताउँदै आएको छ।
प्रिमियर लिगमा दुई खेल खेलेको युनाइटेड अंकविहीन हुँदै तालिकाको पुछारमा रहेको छ। टिमले राम्रो प्रदर्शन गर्न नसकेपछि रोनाल्डो क्लबमा बस्न इच्छुक नभएको बताइएको छ।
रोनाल्डोका लागि अहिले खराब समय चलिरहेको छ। गत सिजन उनी इटालियन क्लब युभेन्ट्सबाट प्रिमियर लिग क्लब म्यानचेष्टर युनाइटेड पुगेका थिए। सिजनको सुरुवाती दुई खेलमा पनि रोनाल्डोको प्रदर्शन राम्रो रहेन। ब्राइटन विरुद्धको पहिलो खेलमा उनी बेञ्चमा थिए। दोस्रो हाफमा मैदान प्रवेश गरे पनि गोल गर्न सकेनन्। युनाइटेड २–१ ले पराजित भयो।
यो दुई खेलको नतिजापछि रोनाल्डोमाथि पनि प्रश्न उठ्न थालेको छ। उनको विषयमा यतिसम्म खबर फैलियो कि अब युनाइटेडले नै उनको सम्झौता खारेज गर्ने तयारी गरेको छ। उनको सम्झौता यस सिजनको अन्त्यसम्म छ।