प्रधानमन्त्री देउवाले मनाएपछि मधेस प्रदेश सरकारको आन्दोलन स्थगित

जनकपुरधाम– प्रधानमन्त्री शेरबहादुर देउवाले प्रदेश प्रहरी समायोजनलाई प्राथमिकतामा राख्ने वचन दिएपछि मधेस प्रदेश सरकारले संघीय सरकारविरुद्ध सुरु गरेको आन्दोलन स्थगित गरेको छ। आइतबार र सोमबार धर्नामा बसेको मधेस प्रदेश सरकारले मंगलबारदेखि आन्दोलन स्थगित गरेको मुख्यमन्त्री लालबाबु राउतले बताए।

धर्नास्थलमा आएका प्रदेश प्रमुख हरिशंकर मिश्रले संघ सरकार प्रहरी समायोजनमा गम्भीर रहेको र निर्वाचनलगत्तै गर्ने आश्वासन दिएको जानकारी दिए।

प्रहरी समायोजन गरी प्रदेश सरकारलाई हस्तान्तरण गर्न पटक–पटक संघीय सरकारलाई दबाब दिएको, प्रधानमन्त्रीसँग प्रत्यक्ष भेट गरी आग्रह गरेको, आन्दोलनकै अल्टिमेटम दिँदै ज्ञापनपत्र बुझाउँदासमेत संघीय सरकारले नटेरेपछि मधेस प्रदेश सरकारका मुख्यमन्त्री रावतसहितको टोलीले आइतबारदेखि प्रदेश प्रमुखको कार्यालय परिसरमा धर्ना दिन थालेको थियो।