नेपाललाई आईसीसी क्रिकेट लिग–२ को शीर्ष तीनमा पुर्‍याउने पहिलो लक्ष्य : प्रशिक्षक प्रभाकर

काठमाडौं- नेपाली राष्ट्रिय क्रिकेट टिमका नवनियुक्त मुख्य प्रशिक्षक मनोज प्रभाकर नेपाललाई आईसीसी क्रिकेट लिग-२ को शीर्ष तीनमा नेपाललाई पुर्‍याउने पहिलो लक्ष्य रहेको बताएका छन्।

काठमाडौंको सोल्टी रोडको हायात प्यालेस होटलमा आइतबार भएको पत्रकारसँगको अन्तर्क्रिया कार्यक्रममा बोल्दै मुख्य प्रशिक्षक प्रभाकरले यस्तो बताएका हुन्। नेपालले अब खेल्न बाँकी रहेको १६ खेलमा अधिकांश खेल जत्‍ने लक्ष्य रहेकोसमेत उनले बताए। उनले थपे, 'नेपाललाई शीर्ष तीनमा पुर्‍याउनु नै मेरो पहिलो 'टार्गेट' हो।'

नेपाली टिममा धेरै युवा खेलाडी रहेको र युवाले छिट्टै धेरै कुराहरु सिक्ने  कारणले गर्दा नेपालको खेलमा अबको केही महिनामा व्यापक सुधार गर्ने पनि बताए।

नेपाल लिग-२ मा २० खेलमा ८ जित र ११ हारका साथ १७ अंक जोड्दै तालिकाको छैटौं स्थानमा छ। ग्लोबल छनोटमा सहजै पुग्‍ने हो भने नेपालले लिग–२ को शीर्ष तीनमा रहनुपर्नेछ। यसका लागि नेपालले बाँकी खेलमा राम्रो प्रदर्शन गर्न आवश्यक छ।

जिम्बाबेमा सन् २०२३ मा ग्लोबल छनोट हुने मिति तय भएको छ। ग्लोबल छनोटमा १० टिमले सहभागीता जनाउनेछन् र शीर्ष दुई टोलीले विश्वकपमा स्थान बनाउनेछ।