शेखर कोइरालाले बोलाए समूह भेला

काठमाडौं- नेपाली कांग्रेसका नेता शेखर कोइरालाले आफ्नो समूह भेला बोलाएका छन्। नेता कोइरालाले शनिबार समूह भेला बोलाउको शेखर समूहका एक नेताले जानकारी दिए। 

उनले भने, 'सिट बाँडफाँड, भ्रातृ संगठनको नेतृत्व चयनमा सल्लाह नगरेकोलगायतका विषयमा छलफल गर्न भेला बोलाइएको हो। भेलाको समय भने टुंगो लागेको छैन।'

सत्ता गठबन्धनले सिट बाँडफाँडका विषयमा छलफल गरिरहेको समयमा नेता कोइरालले समूह भेला बोलाएका हुन्। बिहीबार सभापति शेरबहादुर देउवाले महिला संघको अध्यक्षमा उषा मिश्र रावतलाई मनोनित गरेका छन्।

यसअघि कांग्रेसका भ्रातृसंस्थाहरु नेपाल विद्यार्थी संघको अध्यक्षमा दुजाङ शेर्पा, तरुण दलको अध्यक्षमा विद्वान गुरुङ र किसान संघको अध्यक्षमा गणेश तिमिल्सिनालाई मनोनित गरेको छ। त्यसैगरी आदिवासी जनजाती संघको अध्यक्षमा ओम थापा मगरलाई मनोनित गरिएको थियो। कुनै पनि भ्रातृ संस्थाको नेतृत्व चयनका बेला आफूहरुलाई जानकारी नगराएको र आफ्नो समूहका कसैलाई पनि भाग नदिएको कोइराला समूहको गुनासो छ।