सिट बाँडफाँडबारे आधिकारिक धारणा तय गर्न कांग्रेसले बोलायो कार्यसम्पादन समिति बैठक

काठमाडौं– नेपाली कांग्रेसले सत्ता गठबन्धनभित्र चुनावी तालमेल तथा भागबण्डाका लागि बनाइएको कार्यदलमा आफ्नो अडान र दृष्टिकोणका विषयमा स्पष्ट पार्नका लागि केन्द्रीय कार्यसम्पादन समितिको बैठक बोलाएको छ। 

कार्यसम्पादन समितिको बैठक शनिबार बिहान ९ बजे बस्ने बताइएको छ। बैठकमा सिट बाँडफाँडका विषयमा पार्टीको आधिकारिक धारणा तय गरिने सहमहामन्त्री जीवन परियारले जानकारी दिए। कांग्रेसले सत्ता गठबन्धनबीच तालमेल हुँदा १०० सिट पाउनुपर्ने अडान लिँदै आएको छ। तर, गठबन्धनभित्र दलहरुले आफ्नो तर्फबाट दाबी प्रस्तुत गर्दै गर्दा कांग्रेसको आधिकारिक अडान र दृष्टिकोणका विषयमा थप स्पष्ट गरिने ती पदाधिकारीको भनाइ छ। 

यस्तै बैठकमा चुनावी अभियान सञ्चालनका विषयमा पनि निर्णयमा पुग्ने सन्दर्भमा पनि निर्णय लिइने छ। यसअघि भदौ २ देखि सुरु गर्ने भनिएको अभियान ७ गतेदेखि २४ गते तय गर्ने सहमहामन्त्री परियारले बताए। यस्तै प्रतिनिधिसभा र प्रदेशसभा चुनावका लागि दल दर्ता गर्ने निर्णय पनि गरिनेछ।