मेस्सी पीएसजी खेलाडीका लागि रोल मोडल : ग्याल्टियर

काठमाडौं– प्रशिक्षक माउरिसियो पोचेटिनोको बर्खास्तीसँगै पीएसजी क्लबको नयाँ प्रशिक्षक बनेका क्रिस्टोफे ग्याल्टियर अर्जेन्टाइन फर्वार्ड लियोनल मेस्सीका ठूला प्रशंसक हुन्। उनले मिडियासँग कुरा गर्दै मेस्सी क्लबका सबै खेलाडीका लागि रोल मोडल रहेको बताएका छन्।

उनले भने, ‘लियोनल मेस्सी हाम्रो टिमको रोल मोडल हुन्। उनले पीएसजीको मैदानमा बिताएका पल धेरै महत्त्वपूर्ण छन्। हामीले त्यसलाई स्वीकार गर्नुपर्छ। यो सबैलाई थाहा भएको कुरा हो, मेस्सी धेरै तिर्खाएका खेलाडी हुन्। उनले खेलको अवस्थालाई बुझ्दै सोहीअनुसार खेल्ने गर्छन्। जब मेस्सी मैदानमा खेलाडीसँग मुस्कुराउँछन्, उनका साथमा सबै मुस्कुराउने गर्छन्। साथै, उनलाई टिममा सबैले सम्मान गर्छन्।’

ग्याल्टियरले मेस्सी सबै ट्रेनिङमा संलग्न हुने कारण उनी सबै खेलाडीका लागि उदाहरणीय पनि रहेको बताए। उनले भने, ‘मेस्सी सबै ट्रेनिङमा संलग्न हुने गर्छन्। यसले गर्दा अन्य खेलाडीलाई पनि ट्रेनिङमा उपस्थित हुने प्रेरणा मिल्छ। उनी सबै खेलाडीका लागी उदाहरण हुन्।’

ग्याल्टियरको प्रशिक्षणमा रहेको पीएसजीले लिग वानमा शानदार खेल्दै नयाँ सिजनको सुरुवात गरिसकेको छ। लिग वानको पहिलो खेलमा पीएसजीले क्लेरमन्टविरुद्ध ५–० को प्रभावशाली जित निकालेको थियो। सोही क्रममा पीएसजीका लागि मेस्सीले दुई गोल र एक असिस्ट गरेका थिए।