अभिनेता अनुपविक्रम कांग्रेसमा प्रवेश

काठमाडौं- अभिनेता अनुपविक्रम शाही नेपाली कांग्रेसमा प्रवेश गरेका छन्। शाही शुक्रबार बिहान एक कार्यक्रमका बीच कांग्रेसमा प्रवेश गरेका हुन्। 

उनलाई गृहमन्त्री एवं कांग्रेस नेता बालकृष्ण खाणले पार्टीको सदस्यता प्रदान गरे। खाणले उनलाई पार्टीको सदस्यतासँगै नेपाल तरुण दलको सदस्यता पनि प्रदान गरेका छन्।

मन्त्री निवास पुल्चोकमा आयोजित पार्टी प्रवेश कार्यक्रममा तरुण दलका पूर्वअध्यक्षहरू महेन्द्र यादव, उदय शमशेर राणा, जितजंग बस्नेतका साथै अध्यक्ष विद्वान गुरुङलगायत उपस्थिति रहेको थियो।

शाहीले दुई दर्जनभन्दा बढी चलचित्रमा अभिनय गरिसकेका छन्। अभिनेता शाहीले द्रव्य, सौर्य, हँसिया, ठमेल डटकम, हाउ फन्नी, वीर विक्रम, कमलेको बिहे, कृ, हुर्रे, लिलिबिली, पुरानो बुलेटलगायत चलचित्रमा अभिनय गरेका छन्।

पार्टी प्रवेश गर्दै शाहीले लोकतन्त्र र जनताको अधिकारका लागि कांग्रेसले गरेको योगदान बुझेर पार्टी प्रवेश गरेको बताएका छन्।