प्रिमियर लिगमा चेल्सी र टोटेनहमको जित, बराबरीमा रोकियो लिभरपुल

काठमाडौं- शनिबार राति सम्पन्न भएको इंग्लिस प्रिमियर लिग (ईपीएल) को दोस्रो दिनको खेलमा साविक उपविजेता लिभरपुल बराबरीमा रोकिएको छ।

फुलहामको मैदानमा सम्पन्न पहिलो लेगेको खेलमा लिभरपुलले घरेलु टिमविरुद्ध २–२ को बराबरी खेलेको हो।

एक गोलले पछि परेको अवस्थामा युवा खेलाडी डार्विन नुएजले गोल गर्दै लिभरपुललाई बराबरीमा ल्याएका थिए। खेलको ५०औं मिनेटमा फर्मिनोको ठाउँमा मैदान पसेका नुनेजले ६४औं मिनेटमा गोल गरे। तर ३२औं मिनेटमा पहिलो गोल गरेका अलेक्जेन्डर वित्रोविचले ७२औं मिनेटमा फुलहामका लागि अर्को गोल गरे।

त्यसपछि पुनः एक गोलले पछि परेको अवस्थाबाट मोहम्मद सलाहले बराबरी गोल गरेका हुन्। यससँगै दुवै टिमको बराबरी १,१ अंक भएको छ।

शनिबार रातिको अर्को खेलमा भने टोटेनहमले घरेलु मैदानमा साउथह्याम्टनलाई ४–१ ले हराएको छ। खेलको १२औं मिनेटमा साउथह्याम्टनले पहिलो गोल गरेर अग्रता बनाए पनि टोटेनहमका लागि रियल सेसेगन, इरिक डायर, मोहम्मद सलिसु र डेजन कुलुसेभ्स्कीले गोल गरेका थिए।

त्यस्तै, एभर्टको घरेलु मैदानमा चेल्सीले साँघुरो जित निकालेको छ। जर्गिन्होको गोलको सहयोगमा चेल्सीले जित निकालेर पहिलो खेलबाटै तीन अंक सुरक्षित गरेको हो। गएरातिकै खेलमा बर्नेमाउथले एस्टन भिल्लालाई हराएको छ भने न्युकासलले नटम फरेस्टलाई पनि समान २–० ले हराएको छ।

प्रिमियर लिगमा आइतबार म्यानचेस्टर सिटीले वेस्ट ह्यामको सामना गर्नेछ। यो खेल राति सवा ९ बजे सुरु हुनेछ। आइतबार राति पौने ९ बजे सुरु हुने खेलमा भने म्यानचेस्टर युनाइटेडले ब्राइटनको सामना गर्नेछ।