पानीको बहाव बढ्दै गएपछि कोसी ब्यारेजका ३२ ढोका खुला गरिए

काठमाडौं- सप्तकोसी नदीमा पानीको बहाव बढ्नेक्रम जारी रहेपछि ब्यारेजका ३२ ढोका खुला गरिएको छ।  पानीको बहाव बढेसँगै ५६ मध्ये ३२ ढोका खुला गरिएको हो। 

पहाडी जिल्लाहरूमा अत्यधिक वर्षा भएको र सप्तकोसीमा जोडिने नदीहरूमा पानीको सतह अत्यधिक रहेकाले कोसीमा पानीको बहाव अस्वभाविकरुपमा बढ्ने अनुमान गरिएको हो । कोसी नदीमा पानीको अत्यधिक बहाव हुनसक्ने जानकारीपछि कोसी ब्यारेजसहित कोसीको संरचनालाई निगरानी गरिरहेको प्रहरी उपरीक्षक काफ्लेले बताए । उनका अनुसार तटीय क्षेत्रका बासिन्दालाई सतर्क रहनसमेत आग्रह गरिएको छ ।

पानीको बहाव २ लाख २३ हजार ७७५ क्युसेक प्रतिसेकेन्ड पुगेपछि दबाब कम गर्न ब्यारेजका थप ढोकाहरु खोल्‍ने क्रम सुरु गरिएको कोसी ब्यारेज नियन्त्रण कक्षले जनाएको छ। पानीको बढ्दो बहावका कारण कोसी ब्यारेजका सबै ढोका खोल्दा पनि पानीको ठूलो दबाब ब्यारेजमा पर्ने अनुमान गरिएको छ।

कोसी ब्यारेजले नौ लाख क्युसेक पानीको बहाव धान्‍न सक्ने बताइए पनि नदीको सतहमा बालुवा थुप्रिएकाले ४ लाख क्युसेक माथिको बहावलाई प्राविधिकहरूले सम्भावित जोखिमका रूपमा लिने गरेका छन्। बराह क्षेत्रमा देखिएको पानी कोसी ब्यारेजको मापनमा आइपुग्दा ५ लाख क्युसेकको हाराहारीमा पुग्‍नसक्ने अनुमान गरिएको छ।

कोसीमा अत्यधिक बहाव हुनसक्ने भएपछि सुनसरीमा पनि उच्च सतर्कता अपनाइएको प्रमुख जिल्ला अधिकारी इन्द्रदेव यादवले बताए। यस्तै बस्तीतर्फ कोसी प्रवेश गरेकोले उदयपुरमा पनि उच्च सतर्कता अपनाइएको छ।