कैलालीमा विद्यार्थीले गरे विद्यार्थीमाथि चक्कु प्रहार

धनगढी- कैलालीमा चक्कु प्रहारबाट एक जना घाइते भएका छन्। चक्कु प्रहारबाट जिल्लाको गौरीगंगा नगरपालिका-८, बढैपुरका २२ वर्षीय इडेन सुनार घाइते भएका हुन्। 

उनको दाहिने हातखुट्टा र घाटीमा चोट लागेको प्रहरीले जनाएको छ। उनलाई बचाउने क्रममा बर्दगोरीया गाउँपालिका-२, बौनियाका अन्दाजी ३० वर्षीय जुद्धबहादुर साउँद घाइते भएका छन्। उनको दाहिने हातमा चोट लागेको छ। 

घोडाघोडी बहुमुखी क्याम्पस सुखडदेखि बसमा घरतर्फ जाँदै गरेका उनलाई घोडाघोडी नगरपालिका–४ डोकेबजारमा चक्कु प्रहार भएको प्रहरीले बताएको छ। 

सोही क्याम्पसमा अध्ययनरत गौरीगंगा नगरपालिका-९, मसुरियास्थित मनकामना ड्राइभिङ्ग सेन्टर नजिक बस्ने अन्दाजी वर्ष २३ का सुनिल आउजी, वडा नम्बर ५ अण्डैया बस्ने अन्दाजी २० वर्षीय पुष्कर भाट लगायत अन्य पहिचान नखुलेका दुई जना मिलेर चक्कु प्रहार गरेको जिल्ला प्रहरी कार्यालय कैलालीका प्रवक्ता प्रहरी नायव उपरीक्षक वेदप्रकाश जोशीले बताए।  

पहिलेदेखिको झगडाको विषयलाई लिएर अचानक सुनिल आउजीले सुनारमाथी चक्कु प्रहार गरेको प्रहरी नायव उपरीक्षक वेदप्रकाश जोशीले बताए। 

घाइतेको पोलिक्लीनिक पहलमानपुरमा उपचार भइरहेको र चक्क प्रहार गर्ने फरार रहेको जोशीले बताए। चक्कु प्रहार गर्नेको खोजीकार्यका लागि प्रहरी नायव निरीक्षक गगनबहादुर बोगटीको कमाण्डमा पाँच जनाको प्रहरी टोली खटाइएको उनले बताए।