शारीरिक सुगठनमा रजत तथा कास्य पदक विजेतालाई नगद पुरस्कार

काठमाडौं- हालै सम्पन्न ५४औं एशियन शारीरिक सुगठन तथा फिजिक्स स्पोर्टस् च्याम्पियनन्सिपमा शारीरिक सुगठन प्रतियोगिताको रजत र काश्य विजेतालाई नगद पुरस्कारले सम्मान गरिसकेको छ।

च्याम्पियनसिपमा ८० केजी तौल समूहको प्रतिस्पर्धामा रजत पदक विजेता नेपाली टिमका खेलाडी उमेश राई तथा फिटनेस फिजिक्सको प्रतिस्पर्धामा कास्य पदक विजेता राजु राईलाई नेपाल शारीरिक सुगठन तथा फिटनेस संघका अध्यक्ष श्री राजेशबाबु श्रेष्ठज्यूले एक समारोहकाबीच पुरस्कृत गरेका हुन्। 

उनले व्यक्तिगत रुपमा रजत पदक विजेतालाई नगद एक लाख ५० हजार तथा कास्य पदक विजेतालाई नगद ७५ हजार पुरस्कार प्रदान गरे।

सोहि अवसरमा नेपाल शारीरिक सुगठन तथ फिटनेस संघका प्रथम उपाध्यक्ष श्री विजय लाल कायस्थज्यूले विजेता खेलाडीहरुलाई क्रमशः नगद २० हजार र १० हजार ले पुरस्कृत गरेका छन्। उक्त अवसरमा संघका उपाध्यक्ष श्री दिनेश राजभण्डारीले खेलकुदको माध्यमबाट राष्ट्रको पहिचान बढाउने तथा देशको झण्डा विश्व सामु फहराउन सफल विजेता खेलाडीहरुलाई राष्ट्रले उचित कदर गर्नु पर्नेमा जोड दिए।

सोही कार्यक्रममा विश्व शारीरिक सुगठन तथा फिजिक्स स्पोर्ट्स फेडेरेशनले संघका अध्यक्ष राजेशबाबु श्रेष्ठलाई फेडेरेशनको साइन्स एण्ड रिसर्च कमिटिको अध्यक्षमा मनोनित गरेको छ। यसकारण नेपालको शारीरिक सुगठन संघ एवं खेलको अझ उचाई बढेको महशुस गर्दै विश्व फेडेरेशनका अध्यक्ष दातुक पौल चुवालाई दक्ष एव योग्य व्यक्तिलाई उक्त पदमा मनोनित गरिएकोमा धन्यवाद ज्ञापन गरिएको छ। 

अब नेपालले ५५औं एशियन शारीरिक सुगठन तथा फिजिक्स स्पोर्टस् च्याम्पियनन्शिप प्रतियोगिता आागामी सन् २०२३ को सेप्टेम्बरमा काठमाडौंमा आयोजना गर्दैछ र नेपाल एक न्यूट्रल भेन्यू भएकोले एशियाको हालसम्मकै आयोजना भन्दा बढी राष्ट्रको सहभागिता हुने भएको छ।