बस्तीमा कोसी पसेपछि गाउँ छाड्न थाले बेलकाबासी

काठमाडौं– उदयपुरको बेलका नगरपालिका– ८ स्थित जिरो प्वाइन्टबाट सप्तकोसी नदीको बाढी बस्तीमा पसेपछि स्थानीय त्रसित बनेका छन्। नदी बस्तीमा पसेसँगै सयौं घर जोखिममा परेका छन्। कटान रोक्न सरकारी तहबाट भएको प्रयास प्रभावकारी नहुँदा बाढी अस्थायी बाँध फुटाएर बस्तीमा पसेको हो।

त्यहाँका स्थानीयवासी अहिले गाउँ छोड्न थालेका छन्। आफ्ना सामान बोकेर सुरक्षित ठाउँतर्फ जान लागेका तस्बिरहरु सामाजिक सञ्जालमा आइरहेका छन्। २०४५ सालदेखि कोशी पूर्वतिरबाट बग्न थालेपछि अहिले कोशी पसेको ठाउँमा क्षेत्रमा बस्ती बसेको थियो। ३४ वर्षपछि कोशीले आफ्नो पुरानै बाटो समातेको हो।

यसैबीच, बाढी प्रभावितलाई स्थानान्तरण, राहत र उद्धारको तत्काल व्यवस्थापन गर्न गृहमन्त्री खाणले सम्बन्धित सबै निकायलाई निर्देशन दिएका छन्। सप्तकोशीको पानीको बहाबले करिब ५० मिटरजति जमिन कटान गरिसकेकाले नजिकै रहेका बस्तीका नागरिकलाई अन्यत्र सार्ने काम गृहमन्त्री खाणको निर्देशनमा सुरु भइसकेको उदयपुरका प्रहरी प्रमुख प्रहरी उपरीक्षक सुवास बोहोराले जानकारी दिएका छन्।

गृहमन्त्री खाणले बेलकामा सप्तकोशी कटानबारे परराष्ट्रमन्त्री नारायण खड्कासँग पनि छलफल गरेका छन्। कटानबाट प्रभावित हुने बस्तीका नागरिकलाई कहाँ स्थानान्तरण गर्ने, उनीहरूलाई तत्कालका लागि बासस्थान, राहतको व्यवस्था कसरी गर्नेबारे छलफल भएको बताइएको छ। परराष्ट्रमन्त्री खड्काको गृहजिल्ला उदयपुर हो।