नेपाल र बंगलादेशबीच बराबरी, भारतले हारे फाइनलमा

काठमाडौं- साफ यू-२० च्याम्पियनसिप फुटबल अन्तर्गत नेपालले बंगलादेशसँग बराबरी खेलेको छ। भारतको भुवनेश्वरस्थित कालिंगा स्टेडियममा मंगलबार भएको खेलमा नेपालले बंगलादेशसँग १-१ गोलको बराबरी खेलेको हो।

खेलको दोस्रो हाफमा दुवै टिमले गोल गर्दै अंक बराबरी गरेका थिए। खेलको ६३औं मिनेटमा मोहमद पियास अमहेद नोभाले गोल गर्दै बंगलादेशलाई सुरुआती अग्रता दिलाए पनि ६८औं मिनेटमा नेपालका निरञ्जन मल्लले गोल गर्दै बराबरीमा फर्काएका थिए।

जितसँग बंगलादेशले फाइनलमा स्थान पक्का गरेको छ। अपराजित बंगलादेशले ४ खेलमा १० अंकसहित शीर्षस्थानमा छ।

नेपालले फाइनल पुग्न भारत र माल्दिभ्सबीचको खेलको नतिजा कुर्नु पर्नेछ। भारतले माल्दिभ्ससँग हारे नेपाल फाइनल प्रवेश गर्नेछ। भारतले जित वा बराबरी गरे नेपाल बाहिरिने पक्का छ।

भारत र माल्दिभ्सबीचको खेल बेलुका ७:१५ मा  सुरु हुँदैछ। भारत ३ खेलमा ६ अंक जोडेर तेस्रो स्थानमा छ। १ अंक मात्र बनाएको मालदिभ्स फाइनलको स्पर्धाबाट बाहिरिइसकेको छ।