इंग्ल्यान्डलाई पहिलो पटक युरो कपको उपाधि

काठमाडौं- इंग्ल्यान्डले पहिलो पटक महिला युरो कपको उपाधि जितेको छ। इंग्ल्यान्डले घरेलु मैदानमा आइतबार राति सम्पन्न भएको खेलमा जर्मनीलाई २-१ ले हराउँदै ऐतिहासिक उपाधि जितेको हो।

इंग्ल्यान्डलाई जित दिलाउनका लागि ई टोनी र सी केलीले गोल गरेका थिए। खेलको निर्धारित ९० मिनेटमा १-१ को बराबरी गरेपछि खेल अतिरिक्त समयमा गएको थियो।

जहाँ सब्स्टिच्युटको रुपमा मैदान पसेकी केलीले ११०औं मिनेटमा गोल गर्दै घरेलु टिमलाई पहिलो पटक युरो कप साथै पहिलो मूख्य प्रतियोगिताको उपाधि दिलाएकी हुन्। पोस्टमा गोल प्रहार गर्नुपूर्व उनले गोल ‘स्योर’ गरेर मात्र प्रहार गरेकी थिइन्।

सन् १९६६ को पुरुष विश्वकप फाइनलमा पनि जर्मनीलाई हराउँदै इंग्ल्यान्डले उपाधि जितेको थियो। त्यसको ५६ वर्षपछि इंग्ल्यान्डको महिला टिमले जर्मनीलाई हराएर उपाधि जितेको हो। उपाधि जितेपछि खेलाडी मैदानलाई चुम्दै उपाधि सेलिब्रेसन गरेका थिए।