गठबन्धनले मुलुक अस्तव्यस्त बन्यो : विष्णु पौडेल

बुटवल– नेकपा एमालेका उपाध्यक्ष एवं पूर्व अर्थमन्त्री विष्णु पौडेलले वर्तमान सरकारका कारण मुलुक अस्तव्यस्त बनेको बताएका छन्।

मदन भण्डारी स्पोर्टस एकेडेमी रुपन्देहीले आइतबार बुटवलमा आयोजना गरेको राष्ट्रपति रनिङ शिल्ड प्रतियोगिताका विजयी खेलाडीहरुको सम्मान कार्यक्रममा एमाले उपाध्यक्ष पौडेलले सत्ता गठबन्धनका कारण मुलुकको सबै क्षेत्र अस्तव्यस्त बनेको बताएका हुन्।

‘महँगी र भ्रष्टाचार बढेको छ। शिक्षा, स्वास्थ्य, खेलकुद जताततै अस्तव्यस्तता छ,’ पौडेलले भने। उनले गठबन्धनलाई सत्ता कसरी जोगाउने भन्ने मात्र चिन्ता रहेको बताए। एमाले सरकारबाट हटेपछि देशमा देखिएको बेथितीले पनि एमाले बाहेक अरुले नेतृत्व गर्न नसक्ने कुराको पुष्टि हुने पनि उनले बताए।

राष्ट्रपति रनिङ शिल्ड प्रतियोगितामा रुपन्देहीबाट स्वर्ण, रजत र कास्यपदक विजेता खेलाडीलाई सम्मान गर्दै पूर्व खेलकुदमन्त्री समेत रहेका पौडेलले खेलाडी राष्ट्रका गहना नभई आधार स्तम्भ रहेको बताए। खेलाडीहरुको समस्यामा हरेक समय साथ दिन एमाले तयार रहेको र उनीहरुका मुद्दा सम्बोधनका लागि निरन्तर क्रियाशिल रहने पनि पौडेलले बताए।