भारतलाई पराजित गर्दै फाइनल यात्रा निश्चित गर्ने लक्ष्यमा नेपाल

काठमाडौं- साफ यू-२० च्याम्पियनसिपअन्तर्गत नेपालले तेस्रो खेलमा आज भारतको सामना गर्ने भएको छ। कालिंगा स्टेडियममा नेपाल र भारतबीचको खेल साँझ ७:१५ बजे सुरु हुनेछ।

मुख्य प्रशिक्षक मेघराज केसीले भारतविरुद्ध जितकै लागि खेल्ने बताए। जितको लक्ष्यसहित खेलाडीलाई मैदान प्रवेश गराउने उनको भनाइ छ।  

नेपाल र भारत दुबैको लागि यस खेल महत्वपूर्ण रहेको छ। दुबै टोली एकले अर्कोलाई हराएर फाइनलको यात्रा निश्चित गर्ने लक्ष्यमा हुनेछन्।

उता श्रीलंका लगातार तीन खेल गुमाएर प्रतियोगिताबाट बाहिरिइसकेको छ। बंगलादेश तीन खेलमा तीनै जित निकालेर शीर्षस्थानमा छ। दोस्रो स्थानमा दुई खेलमा दुई जित निकालेको नेपाल छ । तेस्रो स्थानमा भारत छ। उसको तीन अंक छ।

नेपाल र भारतबीचको खेल हुनुअघि सवा ४ बजे माल्दिभ्स र श्रीलंकाबीच प्रतिस्पर्धा हुनेछ। प्रतियोगितामा नेपाल भारतमाथि विजयी भए प्रतियोगितामा सबै प्रकारका समीकरण समाप्त हुनेछ। त्यस स्थितिमा राउन्ड रोबिनको आधारमा चलिरहेको प्रतियोगितामा नेपाल र शंगलादेश फाइनल पुग्नेछन्। पराबरी स्थितिमा बंगलादेश फाइनल पुग्ने पहिलो टिम हुनेछ। दोस्रो टिमका लागि लिग चरणको अन्तिम खेल कुर्नुपर्ने छ।