एक हजार रुपैयाँ चोरीको आरोपमा श्रीमतीको हत्या

बुटवल- रुपन्देहीमा एक हजार रुपैयाँ चोरी गरेको आरोपमा एक पुरुषले श्रीमतीको हत्या गरेका छन्। रुपन्देहीको कञ्चन गाउँपालिका–१ डेलरकी ३१ वर्षीया सावित्रा थापा क्षेत्रीलाई श्रीमान ३३ वर्षीय यमबहादुर पछाईले हत्या गरेको प्रहरीले पुष्टि गरेको छ।

घटनाको अघिल्लो दिन साँझ दराजमा राखेको एक हजार रुपैयाँ निकालेर नजिकैको पसलमा गएर रक्सी खाएको झोंकमा कुटपिट गर्दा श्रीमान यमबहादुरले हत्या गरेको इलाका प्रहरी कार्यालय सालझन्डीका प्रहरी निरिक्षक जगन्नाथ मरासिनीले बताए। प्रहरीले घटनालगत्तै अनुसन्धान गरी हत्या आरोपमा श्रीमान थापालाई पक्राउ गरेको छ।

'श्रीमानले दराजमा राखेको एक हजार पैसा निकाली रक्सी किनेर खाई राति सावित्री थापा घरमा आएर सुतिन्। रातको करिब २ बजेको समयमा यम बहादुर थापा उठेर दराजमा राखेको पैसा गन्दा एक हजार कम भएपछि निज यम बहादुरले श्रीमतीलाई उठाई पैसा नसोधी किन लिई गएको भनि कुटपिट गर्ने क्रममा श्रीमतीको कपाल समाई खाटको खुट्टा र भित्तामा टाउको ठोकिदिई श्रीमतीको हत्या गरेको अनुसन्धानबाट खुलेको छ,’ प्रहरी निरीक्षक मरासिनीले भने।

क्षेत्रीलाई पक्राउ गरी ज्यान सम्बन्धी कसुर अन्तर्गत म्याद थप गरी थप अनुसन्धान कार्य भइरहेको प्रहरीले बताएको छ। बुधबार सावित्रा थापाको  कोठामा मृत अवस्थामा शव फेला परेको थियो।