टिकटक बनाउँदा कुपिन्डेमा बेपत्ता भएका व्यक्ति २४ घण्टापछि मृत भेटिए

सल्यान- टिकटक भिडियो बनाउनका लागि कुपिन्डे दहमा प्रवेश गरेका २४ घण्टापछि मृत भेटिएका छन्। सल्यानको बनगाड कुपिण्डे नगरपालिका-८ स्थित कुपिण्डे दहमा डुबेर बेपत्ता भएका कपुरकोट गाउँपालिका-६ सिनबाङका वेदबहादुर बस्नेत मृत अवस्थामा भेटिएका हुन्।

टिकटक भिडियो बनाउने क्रममा ढुंगाबाट चिप्लिएर खस्दा मंगलबार दिउँसोदेखि बस्नेत बेपत्ता थिए। सुर्खेतबाट आएको सशस्त्र प्रहरीको गोताखोर टोलीले उनको शव भेटाएको हो। करिब ५० मिटर गहिराइमा खोचमा जेलिएको अवस्थामा उनको शव फेला पारेको जिल्ला प्रहरी कार्यालय सल्यानका प्रहरी नायब उपरीक्षक सुमित खड्काले जानकारी दिए। 

धादिङको खानीगाउँ गाउँपालिका-३ का ३२ वर्षीय मूलबहादुर तामाङलाई घुमाउनका लागि बस्नेत मंगलबार कुपिण्डे ताल पुगेका थिए। उनीहरू वैदेशिक रोजगारीका क्रममा विदेशमा रहँदा साथी बनेका थिए। 

बस्नेतको शव पोस्टमार्टमका लागि जिल्ला अस्पताल सल्यानमा ल्याइने प्रहरीले जनाएको छ।