रुपन्देहीको कल सेन्टरमार्फत गरिने ठगीबारे सीआईबीको टोलीले थाल्यो अनुसन्धान

बुटवल- रुपन्देहीको तिलोत्तमास्थित ब्लु स्काई सोलुसन नामक कल सेन्टरले गैरकानुनी रुपमा गरेको कारोबारबारे केन्द्रीय अनुसन्धान ब्युरो (सीआईबी)को टोलीले अनुसन्धान थालेको छ। साइबरसम्बन्धी विज्ञसहितको प्रहरी अधिकृतको दुई जनाको टोलीले मंगलबारबाट अनुसन्धान थालेको हो।

सोमबार साँझ बुटवल आइपुगेको टोलीले मंगलबारबाट बरामद गरिएका कप्युटर, ल्यापटप र कल सेन्टरमा ऋण प्रवाहका लागि प्रयोग गरिएको एप्सहरुको बारेमा अनुसन्धान थालेको इलाका प्रहरी कार्यालय बुटवलका प्रहरी नायब उपरीक्षक ठगबहादुर केसीले बताए। 

साइबरसम्बन्धी जनशक्ति नहुँदा रुपन्देही प्रहरीले अनुसन्धान ब्यूरोबाट अनुसन्धानका लागि टोली मगाएको थियो। आइतबार रुपन्देहीको तिलोत्तमा २ जानकीनगरमा ब्लुस्काइ सोलुशन नामक कल सेन्टरमा प्रहरीले छापा मार्दा नेपालबाट भारतीय नागरिकलाई बैंकिङ ऋण प्रवाहका नाममा ठगी गर्ने गरेको पत्ता लगाएको थियो। कल सेन्टर दर्ता भए पनि अन्य कुनै साइनबोर्ड समेत नराखेर शंकास्वद काम गरेको सूचनाका आधारमा प्रहरीले छापा मारेको जनाएको छ। 

इन्टरनेटमार्फत हुने अपराध भएकाले साइबर सम्बन्धी विज्ञ टोलीले अनुसन्धान थालेको हो। ठगि कसुरमा मुख्य अभियुक्तका रुपमा भारत बिहार‍को गायविद्या पञ्चायत मचारी घर रहेका २५ वर्षीय जिसाद दबङ भन्ने निरञ्जन कुमार र दाङ घोराही उपमहानगरपालिका १३ का ४० वर्षीय हिमाल बाठामगरलाई पक्राउ गरेर अनुसन्धान अघि बढाएको छ। बैंकिङ एप्समार्फत ऋणको प्रलोभनमा पारेर सर्वसाधरणलाई पीडित बनाएको आरोप लगाएको छ। तिलोत्तमा २ जानकीनगर रुरुपथस्थित प्रेमराज गुरुङको घरमा कल सेन्टरले मासिक ३ लाख २५ हजार तिरेर घर भाडामा लिएको थियो। 

रुपन्देहीमा प्रहरीले छापा मारेलगत्तै काठमाडौंस्थित तीनकुनेमा रहेको स्काई वर्ल्ड सर्भिस सेन्टरमा पनि छापा हानेको छ। प्रहरीले उक्त कल सेन्टरबाट ३३ नेपालीसहित चिनियाँ र भारतीय नागरिलाई पक्राउ गरेको थियो। रुपन्देहीको तिलोत्तमा र काठमाडौंको कल सेन्टरबीच सम्बन्ध रहेको हुनसक्ने प्रहरीले अनुमान गरेको छ। बुटवल आएको अनुसन्धान ब्युरोले काठमाडौंसहित देशका मुख्य सहरमा पनि कल सेन्टर सञ्चालन भएको हुनसक्ने आशंका सहित अनुसन्धान अघि बढाएको बताएको छ।