क्यालिफोर्नियामा डढेलोले ६ हजार विस्थापित

क्यालिफोर्निया- क्यालिफोर्नियाको योसेमाइट राष्ट्रिय निकुञ्ज नजिकै शुक्रबारदेखि लागेको डढेलो थप फैलिँदा विस्थापित हुनेको संख्या बढ्दै गएको छ। 

क्यालिफोर्नियाको वन तथा अग्नि संरक्षण विभाग (क्याल फायर)का अफिसर हेक्टर भास्केजले प्रभावित क्षेत्रका ६ हजारभन्दा बढी मानिसलाई सुरक्षितस्थलमा सारिएको जानकारी दिए। 

क्याल फायरको प्रतिवेदनमा जनाएअनुसार ओक फायर नाम दिइएको डढेलो निभाउन १७ हेलिकप्टरसहित दुई हजारभन्दा बढी अग्नि नियन्त्रक खटिएका छन्।

डढेलो सोमबारसम्ममा ५ हजार ७५० हेक्टरभन्दा बढी क्षेत्रमा फैलिइसकेको बताइएको छ। क्याल फायरको रिपोर्टअनुसार ‘अत्यधिक खडेरीले गर्दा जमिनमा चिसोपना घटेको र डढेलो फैलिने जोखिम थप बढिरहेको छ।

अधिकारीहरूले ‘खतरनाक’ भनी वर्णन गरेको डढेलोबाट प्रभावित स्थानमा उद्धारकर्मीहरूले जोखिम क्षेत्रका बासिन्दाहरूलाई उद्धार गर्न र संरचनाहरूको सुरक्षा गर्न खटिरहेका छन्। डढेलोले करिब १५ भौतिक संरचनामा पूर्णतया क्षति पुर्‍याएको छ। हजारौं मानिस डढेलोको जोखिममा परेका छन्। 

क्यालिफोर्नियाका गभर्नर गाभिन न्युजमले शनिबार मारिपोसा काउन्टीमा ‘नागरिक र सम्पत्तिको सुरक्षाको लागि अत्यधिक खतराको अवस्था’ रहेको भन्दै उक्त क्षेत्रमा आपतकालीन अवस्थाको घोषणा गरे।

हालैका वर्षहरूमा, क्यालिफोर्निया र पश्चिमी संयुक्त राज्य अमेरिकाका अन्य भागहरूमा पछिल्ला वर्षहरूमा देखिएको लामो खडेरी र उष्ण जलवायुले गर्दा ठूला डढेलोको जोखिम बढेको छ।