घरभित्रै जलेको अवस्थामा वृद्धाको शव फेला, नजिकै भेटियो मटीतेलको जर्किन

विराटनगर– विराटनगर महानगरपालिका–९ मा एक वृद्धाको शव आफ्नै घरभित्र जलेको अवस्थामा फेला परेको छ। आइतबार साँझ उनको शव फेला परेको मोरङ प्रहरीले जनाएको छ।

विराटनगर–९ की ६७ वर्षीया अमराउदेवी कोठारीको शव फेला परेको प्रहरीले जानकारी दिएको छ। साँझ साढे ७ बजेतिर खबर आएपछि गएर हेर्दा आगोले शरीर पूर्ण रूपमा जलेको अवस्थामा शव फेला परेको थियो।

मृत फेला परेकी वृद्धाका पति विजयसिंह कोठारीले प्रहरीलाई घटनाको जानकारी दिएका थिए। आफू कामको सिलसिलामा बाहिर रहेको र घर पुगेपछि घटना थाहा पाएको बताएको प्रहरीले जनाएको छ। घटना भएका बेला परिवारका अन्य सदस्य घरको माथिल्लो तलामा थिए।

कोठाको चुकुल भित्रबाट लगाएको र आगोले जलेर मृत्यु भएको अवस्थामा वृद्धाको शव भेटिएको हो। कोठा बन्द गरेर वृद्धा आफैंले शरीरमा मटीतेल छर्किएर आगो लगाएको हुनसक्ने आशंका प्रहरीले गरेको छ। शव नजिकै मटीतेलको जर्किन र सलाइ फेला परेको छ। प्रारम्भिक अनुसन्धानबाट घटना शंकास्पद नदेखिएको र पोस्टमार्टम रिपोर्ट आएपछि थप कुरा प्रष्ट हुने प्रहरीले बताएको छ।