क्लासिकोमा बार्सिलोना विजयी, चेल्सीमाथि आर्सनलको प्रभावशाली जित

काठमाडौं– दुई स्पेनिस महारथी क्लब बार्सिलोना र रियल मड्रिडबीच भएको खेलमा बार्सिलोना विजयी भएको छ। आइतबार बिहान अमेरिकाको लस भेगासमा भएको खेलमा बार्सिलोनाले रियललाई १–० ले पराजित गरेको हो।

बार्सिलोनाका नयाँ खेलाडी राफिन्हाले गरेको डेब्यु गोल नै जितका लागि पर्याप्त बन्यो। साथै बार्सिलोनाबाट स्ट्राइकर रोवर्ट लेवान्डोस्कीले पनि डेब्यु गरेका छन्। आफ्ना मुख्य खेलाडी तथा कप्तान करिम बेन्जेमाबिनै मैदान उत्रिएको रियलले एउटा पनि सट गोल पोष्टभित्र गर्न सकेन। केही समयपछि सुरु हुन लागेको स्पेनिस ला लिगाको तयारी तथा विदेश भ्रमणमा रहेका यी टिमले एक मैत्रीपूर्ण खेल खेलेका हुन्।

त्यस्तै अन्य प्रि सिजन टुरअन्तर्गतको मैत्रीपूर्ण खेलहरुमा आर्सनलले घरेलु प्रतिद्वन्द्वी चेल्सीमाथि ४–० को प्रभावशाली जित निकालेको छ। फ्लोरिडामा भएको खेलमा आर्सनलका लागि नयाँ खेलाडी ग्राबियल जेजस, मार्टिन, साका र लोकोन्गाले समान एक–एक गोल गरे।

अर्लिन हालान्डको डेब्यु खेलमा उनकै एकमात्र निर्णायक डेब्यु गोलमा म्यान्चेस्टर सिटीले जर्मन च्याम्पियन वायर्न म्युनिखलाई १–० ले हाराएको छ। सिटीका लागि १२औं मिनेटमा हालान्डले गरेको गोल नै निर्णायक बन्यो। खेल चलिरहेको समयमै भारी वर्षा भएपछि छोट्याइएको खेलको बाँकी समयमा कुनै पनि टिमले गोल गर्न सकेनन्।