सुदूरपश्चिमले पारित गर्‍यो शिक्षण प्रतिष्ठान ऐन संशोधन विधेयक

धनगढी- सुदूरपश्चिम प्रदेशसभाको आजको बैठकमा ‘सुदूरपश्चिम प्रदेश अनुसन्धान तथा प्रशिक्षण प्रतिष्ठान ऐन, २०७७’ लाई संशोधन गर्न बनेको विधेयक पारित भएको छ।

बैठकमा आर्थिक मामिला राज्यमन्त्री अमरबहादुर साउदले उक्त विधेयक पारित गरियोस् भनी प्रस्ताव पेस गरेका थिए। यसअघि उक्त विधेयकमाथि भएको दफावार छलफलमा प्रदेशसभा सदस्य लालबहादुर खड्का, श्यामलाल रानाथारु र हर्कबहादुर कुवँरले भाग लिएका थिए।  

बैठकमा आर्थिक मामिलामन्त्री प्रकाश रावलले प्रस्तुत गर्नुभएको प्रदेश आर्थिक कार्यविधि तथा वित्तीय उत्तरदायित्वका सम्बन्धमा व्यवस्था गर्न बनेको विधेयकमाथि छलफल भएको थियो। छलफलमा भरतबहादुर खड्का, महेशदत्त जोशी र सुशीला बुढाथोकीले भाग लिएका थिए।