मोरङमा डुबेर दुई बालबालिकाको मृत्यु

विराटनगर– मोरङमा डुबेर बिहीबार दुई बालबालिकाको मृत्यु भएको छ। पथरीशनिश्चरे नगरपालिका–९ सगरमाथा चोकमा पैनीले बगाएर १९ महिने बालिकाको मृत्यु भएको छ। 

तेह्रथुमको छथर गाउँपालिका–३ घर भई पथरीशनिश्चरे–९ मा कोठा भाडामा लिएर बस्दै आएका कुमार लिम्बूकी छोरी स्नेहाको शव पैनीले बगाउँदै गरेको अवस्थामा फेला परेको प्रहरीले बताएको छ। प्रहरीका अनुसार पैनीबाट बाहिर निकाल्दा नाबालिकाको मृत्यु भइसकेको थियो। खेल्दै जाँदा खसेपछि बालिकालाई पैनीले बगाएको हुनसक्ने प्रहरीको प्रारम्भिक अनुमान छ। 

उता जहदा गाउँपालिका–७ मा खहरे खोलामा डुबेर दिउँसो एक बालकको मृत्यु भएको छ। घरनजिकै रहेको खहरे खोलामा पौडी खेल्ने क्रममा डुबेर जहदा–७ का अशोक मण्डलका ११ वर्षीय छोरा तरुण मण्डलको मृत्यु भएको मोरङ प्रहरीका डीएसपी राजन कार्कीले जानकारी दिए। 

पौडी खेल्नलाई खोला पसेका तरुण दिउँसो २ः३० बजेतिर खोलामा डुबेको अवस्थामा फेला परेका थिए। डुबिरहेको देखेपछि स्थानीयले खोलाबाट बाहिर निकालेको प्रहरीले बताएको छ। बाहिर निकाल्दा बालकको मृत्यु भइसकेको डीएसपी राजन कार्कीले बताए।