एक वर्षमै अख्तियारमा थुप्रिए २४ हजार बढी उजुरीका चाङ

काठमाडौं– अख्तियार दुरुपयोग अनुसन्धान आयोगमा आर्थिक वर्ष २०७८/७९ मा भ्रष्टाचारसम्बन्धी २४ हजार २४१ उजुरी परेका छन्। यीमध्ये १६ हजार १४८ नयाँ र ८ हजार ९३ वटा उजुरी अघिल्लो आर्थिक वर्ष २०७७/७८ बाट सरेर आएको अख्तियारको विवरणमा उल्लेख छ। 

हरेक वर्ष अख्तियारमा भ्रष्टाचारसम्बन्धी हजारौंको संख्यामा उजुरी पर्ने गरेका छन्। प्रवक्ता श्यामप्रसाद भण्डारीका अनुसार अख्तियारमा सबैभन्दा बढी उजुरी लिखित निवेदनमार्फत पर्ने गरेको छ। आर्थिक वर्ष २०७८/७९ मा ४ हजार ४९५ वटा उजुरी लिखित निवेदनमार्फत परेका थिए। 

दोस्रो ठूलो उजुरीको स्रोत हुलाक सेवा (चिठ्ठी) रहेको छ। गत वर्ष हुलाकमार्फत भ्रष्टाचारसम्बन्धी २ हजार ७६० वटा उजुरी अख्तियारमा परेका थिए। तेस्रोमा इमेलमार्फत आव २०७८/७९ मा २ हजार ७५७ वटा उजुरी परेका छन्। 

प्रवक्ता भण्डारीका अनुसार गत आर्थिक वर्ष समाचारपत्रबाट २९०, फेसबुकमार्फत ९३, भाइबरबाट १५, आयोगको वेबसाइटबाट २ हजार १६५, मोबाइल एसएमएसबाट ४, टेलिफोनबाट ७५०, मोबाइल एपबाट १०२ र अन्य स्रोतबाट २ हजार ७१७ वटा उजुरी परेका थिए।