मोरङ- सुनका गरगहना तथा नगद ४६ हजार रुपैयाँ चोरी गरेको अभियोगमा एक किशोर पक्राउ परेका छन्। चोरी आरोपमा विराटनगर महानगरपालिका-१३ बस्ने १८ वर्षीय किशोर पक्राउ गरिएको प्रहरीले जानकारी दिएको छ।
विराटनगर महानगरपालिका-८ मधुमारा बस्ने ४३ वर्षीय राजेश साहको घरबाट असार २९ गते राति उनले सुनका विभिन्न गहना तथा नगद चोरी गरेका थिए।
उनले १ थान मंगलसूत्र, १ थान सिक्री, ४ थान झुम्का, १ थान लकेट, १२ आनाको औँठी, १ थान तिलहरी चोरी गरेका थिए। यसका साथै चाँदीको पाउजु र २ थान सिक्री पनि उनले चोरी गरेका थिए। उनीबाट ती सबै सामग्री मोरङ प्रहरीले बरामद गरेको छ। उनी यसअघि पनि चोरी मुद्दामा सजाय पाएको खुल्न आएको छ।
उनीमाथि चोरी कसुरमा जिल्ला अदालत मोरङबाट ५ दिन म्याद थप गरी अनुसन्धान थालिएको प्रहरीले जानकारी दिएको छ।