प्रहरीसँगको धकेलाधकेलमा पोखरीमा खसालिए वडाअध्यक्ष

बुटवल- रूपन्देहीको तिलोत्तमा नगरपालिकामा जनप्रतिनिधिहरू दलीय आधारमा विभाजित भएपछि आइतबार दिनभर तनावग्रस्त बनेको छ। 

यसअघि राम्रो काम गरेर नमुना बनेर राष्ट्रिय चर्चा पाएको तिलोत्तमा आइतबार जनप्रतिनिधिबीचको झगडाले राष्ट्रिय चर्चा पाएको हो। आर्थिक बर्ष ०७९/८० को बजेट पारित गर्न बसेको नगरसभाको बैठकमा एमाले र कांग्रेसबाट निर्वाचित जनप्रतिनिधिबीच सहमति हुन नसक्दा नगरसभामा हात हालाहाल र प्रहरीले समेत बल प्रयोग गरेको छ।

नगरप्रमुख रामकृष्ण खाँणले गणपूरक संख्या नपुगेको भन्दै नगरसभा स्थगित गरेपछि स्थिति तनावग्रस्त बनेको थियो। कांग्रेस रूपन्देहीका सभापतिसमेत रहेका खाँण र एमाले नेतृ जागेश्वरीदेवि चौधरीबीच नगरसभामा प्रस्तुत गरिने एजेन्डाबारे सहमति नजुट्दा नगरसभामा विवाद सुरु भएको थियो। 

एमालेका जनप्रतिनिधिले न्यायिक समिति सहित, लेखा, विद्यान समिति टुग्याउनुपर्ने र मेयर खाँणसहित काँग्रेस जनप्रतिनिधि बजेट मात्रै पारित गर्ने पक्षमा विभाजित भएपछि झगडामा परिणत भएको हो। ९० सदस्यीय जनप्रतिनिधि रहेको तिलोत्तमामा ४२ जना मात्रैको उपस्थिति भएको भन्दै नगरप्रमुखले सभा स्थगित गरेका थिए। त्यसपछि एमाले जनप्रतिनिधि आक्रोशित भएका थिए। त्यसपछि नगरसभा स्थल मणिग्राम पार्टी प्यालेस नाराबाजी होहल्लाले अस्तव्यस्त भएको हो।