लुम्बिनी क्याबिनेटका निर्णय सार्वजनिक गर्दै प्रवक्ताले भने- संघले अधिकार नदिए संघर्ष गर्छौं

बुटवल- लुम्बिनी प्रदेश सरकारका प्रवक्तासमेत रहेका आन्तरिक मामिला, कानुन तथा सञ्चारमन्त्री तिलकराम शर्माले संघले अधिकार नदिए संघर्ष गर्ने चेतावनी दिएका छन्। संघीयता बलियो बनाउन आवश्यक परे संघर्ष गर्ने उनको भनाइ छ। 

'सोमबारलेखि देशभरका आन्तरिक मामिला मन्त्रालय समालेका मन्त्रीहरूको भेला हुँदै छ,' मन्त्रिपरिषदको निर्णय सार्वजनिक गर्न आइतबार आयोजित पत्रकार सम्मेलनमा बोल्दै मन्त्री शर्माले भने, 'प्रदेशलाई अधिकार दिन संघ सरकारलाई दवाव दिन्छौँ। प्रदेशमा वित्तीय, प्रहरी र कर्मचारी नहुँदा बजेट कार्यान्वयन गर्न सकिएको छैन। अब अधिकार नदिए संघर्ष गर्छौँ।' 

कस्ता खालको संघर्ष गर्न खोज्नुभयो भन्ने पत्रकारको जिज्ञासामा मन्त्री शर्माले हतियार उठाउने प्रकृतिको संघर्ष भने नहुने बताए। 'संघर्ष विभिन्न प्रकारले गर्न सकिन्छ। हतियार नै उठाउने भनेको होइन,' मन्त्री शर्माले भने। संघले आफू कमजोर हुने भएकाले प्रदेशलाई अधिकार दिन नखोजेको उनको आरोप छ। संघीयता भनेको प्रदेश नै भएको समेत उनको जिकिर छ। 

लुम्बिनी प्रदेश सरकारले असार १५ गते प्रहरी सेवासम्बन्धी ऐन बनाएको छ। उक्त ऐन कार्यान्वयन गर्ने समेत बताए। प्रहरी ऐनमा एआईजीको नेतृत्वमा प्रहरी कमान्ड रहने उल्लेख छ।