लुम्बिनी र राप्ती अस्पतालमा टिकट तथा बेड निःशुल्क

बुटवल- लुम्बिनी प्रदेशका २ अस्पतालमा आइतबार (साउन १) देखि टिकट र बेड नि:शुल्क हुने भएको छ।

प्रदेश सरकारले आर्थिक वर्ष २०७९/८० को बजेटमा लुम्बिनी र राप्ती प्रादेशिक अस्पतालमा उपचारका लागि आउने बिरामीलाई ओपिडी र इमर्जेन्सीको टिकट तथा बेडमा शुल्क नलिने घोषणा गरेको थियो। 

सोही घोषणा अनुसार लुम्बिनी र राप्ती प्रादेशिक अस्पतालमा ओपिडी र इमर्जेन्सी टिकट तथा बेड निःशुल्क हुने भएको हो। 

ओपिडी र बेड निःशुल्क गर्न बजेटमा एक करोड ५० लाख रुपैयाँ विनियोजन भएको छ। टिकट शुल्क नलाग्ने भए पनि बिरामीले टिकट काउन्टरबाट टिकट लिनुपर्ने लुम्बिनी प्रादेशिक अस्पतालका मेडिकल सुपरिटेन्डेन्ट डा. इन्द्र ढकालले बताए।

यस्तै आइतबारदेखि प्रदेशका सरकारी अस्पतालमा सेवा लिने बिरामीका लागि रगत पनि  निःशुल्क हुने भएको छ। रगत नि:शुल्क गर्न लुम्बिनी प्रादेशिक अस्पताल र रक्तसञ्चार सेवा केन्द्रबीच सम्झौतामा हस्ताक्षर भएको छ। 

सरकारले बजेटमा नि:शुल्क रगतका लागि ३ करोड रुपैयाँ बजेट छुट्टाएको छ। अस्पतालकातर्फबाट मेडिकल सुपरिटेन्डेन्ट डा. इन्द्र ढकाल र रक्तसञ्चार केन्द्रका तर्फबाट प्रदेश महासचिव कृष्ण पंगेनीले सम्झौता पत्रमा हस्ताक्षर गरेका हुन्।  

अस्पतालमा आएका बिरामीले चिकित्सकको सिफारिस लिएर रक्त सञ्चार सेवा केन्द्रमा गएपछि पूर्णरुपमा  निःशुल्क रगत उपलब्ध गराउने अस्पतालका मेडिकल सुपरिटेन्डेन्ट डा. ढकालले बताए।