यस्तो छ स्थानीय सरकार सफल बनाउने अस्ट्रेलियन राजदूत भोल्‍कको सूत्र

काठमाडौं- नेपालका लागि अष्ट्रेलियालियन राजदूत फेलिसिटी भोल्कले स्थानीय सरकारको सफलतामा महिलाको सक्षमता जोडिने बताएकी  छन्। उनले महिलालाई सक्षम बनाई आत्मनिर्भरतातर्फ उन्मुख गराउन सकेमात्रै स्थानीय सरकारको सफलता हुने बताएकी हुन्। 

स्याङ्जाको वालिङ नगरपालिकाले मंगलबार आयोजना गरेको कार्यक्रममा  राजदूत भोल्कले महिलालाई सक्षम बनाउने खालका कार्यक्रम अगाडि सारेर आर्थिक उपार्जनसँगै आत्मनिर्भरतातर्फ जोड्नुपर्ने उल्लेख गरिन्। अष्ट्रेलिया सरकारले नेपालका विभिन्‍न स्थानीय तहसँगको सहकार्यमा सञ्‍चालित कार्यक्रम सफल हुँदै गएको उनको भनाइ थियो। आगामी दिनमा पनि त्यसलाई निरन्तरता दिँदै जाने राजदूत भोल्कले धारणा व्यक्त गरिन्।

नागरिकलाई समृद्ध बनाउन विचार तथा कार्यगत योजनाको एकापसमा अनुभव तर सिकाइ आदानप्रदान हुन आवश्यक रहेको राजदूत भोल्कले बताउनुभयो । नेपालका स्थानीय तहले गरेका असल अभ्यासलाई अष्ट्रेलियामा र उताका अभ्यासलाई नेपालमा लागू गर्न सकिने उनको धारणा थियो।

वालिङ नगरपालिका र अष्ट्रेलियाका स्थानीय तहसँग भगिनी सम्बन्ध स्थापित गरी निरन्तर सिकाइ अभ्यास आदान प्रदानका लागि वालिङ नगरपालिका तयार रहेको उपप्रमुख कविता तिवारी गैह्रेले बताइन्। राजदूत भोल्कले वालिङ नगरपालिकाले सञ्चालन गरेको इनोभेशन सेन्टर, सरसफाइ केन्द्रलगायतको अवलोकन गर्नुभएको प्रमुख प्रशासकीय अधिकृत राजन भट्टराईले जानकारी दिइन्।