प्रिमियर लिगमा टोटेनह्यामको लगातार दोस्रो जित

इंग्ल्याण्ड- इंग्लिश प्रिमियर लिग फुटबलमा टोटेनह्यामले लगातार दोस्रो जित निकालेको छ। शनिबार भएको खेलमा फुलहमलाई ३-१ गोल अन्तरले पराजित गर्दै टोटेनह्यामले प्रिमियर लिगमा लगातार दोस्रो जित निकालेको हो। 

घरेलु मैदानमा भएको खेलमा टोटेनहमलाई जित दिलाउन लुकास मौरा, केरियन ट्रीपिएर र ह्यारी केनले समान एक-एक गोल गरे। फुलहमका एलेक्जेन्डर मिट्रोभिकले एक गोल फर्काए। 

यसअघि पहिलो खेलमा टोटेनहमले न्युकासल युनाइटेडलाई २-१ गोल अन्तरले हराएको थियो। प्रिमियर लिग अन्तर्गत नै बोर्नेमाउथले पनि लगातार दोस्रो जित निकालेको छ। 

शनिबार बोर्नेमाउथले वेष्ट ह्याम युनाइटेडलाई २-१ ले पराजित गर्‍यो। यस्तै शनिबार भएको अन्य खेलमा एभर्टनले साउथह्याम्पटनलाई २-१, लेष्टर सिटीले वुल्भ्सलाई २–० ले हराएको छ । कार्डिफ सिटी र न्युकासल युनाइटेडले गोलरहित बराबरी खेल्दै अंक बाँडेका छन्।