बूढीगंगा नगरपालिकामा मेयर–उपमेयर दुवै एमालेले जित्यो

काठमाडौं– बाजुराको बूढीगंगा नगरपालिकामा मेयर र उपमेयर दुवै पद नेकपा एमालेले जितेको छ। आज सम्पन्न मतगणनाअनुसार मेयरमा रणबहादुर बानियाँ ४ हजार ७ सय ७७ मतसहित विजयी भएका छन्।

उनका निकटतम प्रतिद्वन्द्वी सत्ता गठबन्धनबाट नेपाली कांग्रेसका रंगबहादुर खाती ३ हजार ७ सय ७४ मत ल्याएर पराजित भएका छन्। बानियाँले खातीलाई १ हजार ३ मतको फराकिलो अन्तरले हराएका हुन्।

त्यसैगरी, बूढीगंगाको उपमेयरमा पनि एमालेकै उम्मेदवार मायाकुमारी खड्का ४ हजार ७ सय २७ मतसहित विजयी भएकी छन्। उनकी निकटतम प्रतिद्वन्द्वी नेपाली कांग्रेसकी रीताकुमारी शाहीले ३ हजार ७ सय ५५ मत ल्याइन्। 

१० वटा वडा रहेको बूढीगंगामा एमालेले सातवटा वडामा प्यानलसहित जित दर्ता गराउँदा कांग्रेसले तीनवटा वडामा जित निकालेको छ। 

गत वैशाख ३० गते भएको निर्वाचनमा विवाद भएपछि सबै निर्वाचन प्रक्रिया रद्द गरी बूढीगंगामा पुनः निर्वाचन गरिएको हो। कांग्रेस र एमाले कार्यकर्ताबीच झडप हुनुका साथै बुथ कब्जाको आरोप–प्रत्यारोप भएपछि त्यहाँ फेरि निर्वाचन गरिएको हो। 

असार २३ गते पनि केही मतदान केन्द्रमा विवाद भएको थियो। प्रहरीले हवाई फायर गरेर अवस्था नियन्त्रणमा लिने प्रयास गर्नुपरेको थियो। पछि फेरि शान्तिपूर्वक मतदान सकिएको थियो।