विनोद शाही हत्या प्रकरण : १० जनाविरुद्ध मुद्दा दायर, मेयरलाई उन्मुक्ति

काठमाडौं– जिल्ला सरकारी वकिलको कार्यालय अछामले विनोद शाही हत्याको घटनामा १० जनाविरुद्ध कर्तव्य ज्यान मुद्दामा अभियोगपत्र दर्ता गरेको छ।

कार्यालयले पञ्चदेवल विनायक नगरपालिका प्रमुख अम्बिका चलाउनेसहित तीन जनालाई भने मुद्दा नचलाउने निर्णय गरेको छ।

जिल्ला अदालत अछाममा दर्ता गरिएको अभियोगपत्रमा हत्यामा नगर प्रमुख चलाउनेको संलग्नता नरहेको दाबी गरिएको छ। मेयर चलाउने, नेत्रबहादुर शाही र रामबहादुर शाहीलाई पनि मुद्दा नचलाउने निर्णय कार्यालयले गरेको छ। 

प्रहरी अनुसन्धानबाट उनीहरुको संलग्नता पुष्टि हुन नसकेको भन्दै उन्मुक्ति दिइएको हो। परिवारले जाहेरीमा नगर प्रमुखसहितको संलग्नतामा हत्या भएको भन्दै अनुसन्धान हुनुपर्ने माग गरेका थिए। 

जाहेरी दर्ता भएपछि नगर प्रमुख चलाउने आफैं प्रहरी कार्यालयमा उपस्थित भएकी थिइन्। पछि प्रहरीले उनलाई रिहा गरेको थियो।

पक्राउ परेर हिरासतमा बाहेक फरार रहेका ६ जनामाथि पनि मुद्दा दायर भएको छ। फरार अभियुक्तमा अक्कल शाही, सज्जन शाही, कर्ण शाही, शान्ति शाही, द्रौपती शाही र दानमति शाही छन्। दानमति जिल्ला समन्वय समिति सदस्य हुन्।

गत जेठमा घरबाट हराएको ५ दिनपछि शाही नजिकै मृत फेला परेका थिए।