मादी सामूहिक हत्याकाण्ड : चार जनालाई आजीवन कैदको फैसला

काठमाडौं– संखुवासभाको मादीमा भएको सामूहिक हत्याकाण्डका अभियुक्तमध्ये चारलाई आजीवन काराबासको फैसला सुनाइएको छ। जिल्ला अदालत संखुवासभाले सोमबार पुर्पक्षमा थुनामा रहेकामध्ये चार अभियुक्तलाई आजीवन काराबासको फैसला सुनाएको हो। 

अदालतले सबैलाई २ लाख रुपैयाँका दरले क्षतिपूर्तिसमेत भराउने फैसला गरेको छ। आजीवन काराबास सुनाइएकाहरूमा मादी नगरपालिका–१ उम्लिङ खोलागाउँका खड्गबहादुर कार्की, लोकबहादुर कार्की, रणबहादुर कार्की र हस्तबहादुर कार्की छन्।

१७ वर्षीय किशोरलाई भने अदालतले १६ वर्ष कैदको फैसला सुनाएको छ। गत वर्ष भदौ २१ गते मादी नगरपालिका–१ उमलिङका एकै परिवारका ६ जनाको हत्या भएको थियो। ५५ वर्षीय तेजबहादुर कार्की, आमा पार्वती कार्की, श्रीमती कमला, बुहारी ३२ वर्षीया रञ्जना कार्की, ८ वर्षका विपिन कार्की र पाँच वर्षीया गोमा कार्कीको हत्या भएको थियो।