विनोद शाही मृत्यु प्रकरण : अछाम सदरमुकाममा निषेध आदेश

काठमाडौं– अछामको पञ्चदेवल विनायक नगरपालिका–४ का विनोद शाहीको हत्या आरोपीलाई बचाउन प्रयास गरिएको भन्दै स्थानीयबासीले आन्दोलन चर्काएपछि स्थिति तनावग्रस्त बनेको छ। स्थानीयबासीको आन्दोलनले उग्र रूप लिन थालेपछि प्रशासनले मंगलबार बिहानैदेखि सदरमुकाम मंगलसेन आसपासमा निषेध आदेश जारी गरेको छ। 

मृतक शाहीका आफन्तले सोमबारदेखि नै हत्याका आरोपीलाई कडा कारबाही गर्नुपर्ने भन्दै प्रदर्शन थालेपछि निषेध आदेश जारी गरिएको स्थानीय प्रशासनले जानकारी दिएको छ। 

यसअघि सोमबार स्थानीयवासी र प्रहरीबीच मुठभेड नै भएको थियो। हत्यामा संलग्न भनिएकाहरूलाई जोगाउन सरकारी वकिल कार्यालयले नै भूमिका खेलेको आरोप लगाउँदै मृतक शाहीका आफन्त आन्दोलनमा उत्रिएपछि प्रहरीले हवाई फायरसमेत गरेको थियो। 

सोमबार बिहानै मृतक शाहीका आफन्त नाराबाजीसहित जिल्ला सरकारी वकिलको कार्यालय र अदालत घेराउ गर्न पुगेका थिए। उनीहरूलाई रोक्न खोज्दा प्रहरी र आन्दोलनकारीबीच झडपको भएको थियो केही घाइतेसमेत भएका थिए। प्रहरीले स्थिति नियन्त्रणमा लिन अश्रु ग्यास प्रहार गर्दै केही राउण्ड हवाइ फायर समेत गरेको छ। 

मंगलबार पनि मृतकका आफन्तले प्रदर्शनको तयारी गरेपछि स्थानीय प्रशासनले निषेध आदेश जारी गरेको हो। प्रहरीले शाहीको हत्याको आरोपमा पञ्चदेवल विनायक नगरपालिकाकी मेयर अम्बिका चलाउनेसहित १३ जनालाई नियन्त्रणमालिएको छ।  शाहीको हत्यामा संलग्न भएको भन्दै उनीसहित १३ जनाविरुद्ध आफन्तले जाहेरी दर्ता गरेका थिए।

शाही गत जेठ १७ गतेदेखि हारइरहेकामा २१ गते मृत भेटिएका थिए।