धनकुटाकी हिमा बस्नेत प्रदेशसभा सदस्यमा मनोनीत

विराटनगर- धनकुटाकी हिमा बस्नेत (भट्टराई) प्रदेशसभा सदस्यमा मनोनित भएकी छिन्। प्रदेश १ की एमाले सांसद गुलेफुन खातुनले राजीनामा दिएपछि रिक्त रहेको समानुपातिक सिटमा बस्नेतलाई मनोनयन गरिएको हो। 

सरकारी छाप र  दस्तखत किर्ते गरेको अभियोग प्रमाणित भएपछि नेकपा एमालेबाट समानुपातिक सांसद बनेकी खातुनले गत बुधबार राजीनामा दिएकी थिईन्। राजीनामा बिहीबार स्वीकृत भएको थियो। 

खातुनको मुद्दा दोहोर्याउने आदेश दिन सर्वोच्च अदालतले अस्वीकार गरेपछि राजीनामा दिएकी हुन्। खातुनले सरकारी छाप किर्ते गरेको आरोप लागेको थियो। किर्ते मुद्दामा जिल्ला अदालत मोरङले २०७४ बैशाख ३१ गते एक वर्ष कैद सजाय सुनाएको थियो। जिल्लाको फैसला विरुद्ध खातुन २०७४ भदौमा उच्च अदालत विराटनगर गएकी थिइन। २०७६ पुस ६ गते उच्चले उनलाई एक वर्ष कैद र १४ हजार ५ सय ८३ रुपैयाँ जरिवानाको फैसला सुनाएको थियो। 

उच्चको फैसला विरुद्ध खातुनले २०७६ फागुन ११ गते सर्वोच्चमा निवेदन दिएकी थिइन्। सर्वोच्चले सुनुवाईका लागि निस्सा दिएको थिएन। अल्पसंख्यक कोटाबाट बन्द सूचीमा अन्य महिला कोही पनि नभएको कारण खस आर्य कोटाबाट बस्नेत सांसद बनेकी हुन्।

नेकपा एमालेको प्रदेश १ समिति सदस्यसमेत रहेकी बस्नेतलाई निर्वाचन आयोगले सोमबार पत्र दिएको एमाले नेता हिक्मतकुमार कार्कीले जानकारी दिए। बस्नेतलाई मंगलबारको प्रदेश सभामा सपथ ग्रहण गराउने प्रदेश १ का सभामुख प्रदिपकुमार भण्डारीले जानकारी दिए।