ढाकाको राजधानी बन्यो तेह्रथुम

तेह्रथुम- तेह्रथुम जिल्लालाई ढाका कपडाको राजधानी घोषणा गरिएको छ। वाणिज्य तथा आपूर्ति मन्त्रालयले सोमबार तेह्रथुमलाई ढाकाको राजधानी घोषणा गरेको हो। म्याङलुङ नगरपालिकाले आयोजना गरेको कार्यक्रममा मन्त्रालयका सचिव अर्जुन प्रसाद पोखरेलले तेह्रथुमलाई ढाका कपडाको राजधानी घोषणा गरेका हुन्।

हाते तानबाट ढाकाको कपडा उत्पादन गरिन्छ। ढाका कपडा बुन्ने सीप र कलालाई प्रचारप्रसार गर्न, व्यवसायीकरण र विविधीकरणका लागि सरकारले ढाका कपडाको राजधानी घोषणा गरेको मन्त्रालयले जनाएको छ। 

‘तेह्रथुमको ढाका कपडा गुणस्तरीय र प्रसिद्ध पनि छ। तर कपडाको बजारीकरणमा सरकारको ध्यान पुगेको पाइएन,’ मन्त्रालयका सचिव पोखरेलले भने, ‘सीप विकास र बजारीकरणमा पनि अगाडि बढाउनुपर्छ भनेर नै मन्त्रालयको चाहनाअनुसार राजधानी घोषणा गरिएको हो।’

म्याङलुङ नगरपालिका प्रमुख संजय कुमार तुम्बाहाङफेले ढाकाको राजधानी घोषणा भएपछि ढाकाका कपडाको व्यवसायीकरण गर्न अझ सहयोग पुग्ने विश्वास व्यक्त गरे। 

घरेलु तथा साना उद्योग कार्यालयका अनुसार जिल्लामा १ सय ४५ वटा ढाका कपडा उद्योग दर्ता भएर सञ्चालनमा छन्। तर थुप्रै उद्योग दर्ताविना नै सञ्चालनमा रहेको आकलन गरिएको छ।