दुबईबाट आएका सुमनको लगेजमा कसरी छिर्‍यो सुन?

काठमाडौं– दुबईबाट काठमाडौं आएका एक यात्रुले बच्चाले लगाउने कपडाको टाँकभित्र सुन राखेर नेपाल भित्र्याएका छन्। सोमबार बिहान करिब ११ बजे दुबईबाट काठमाडौं आएका सुमन दमाईको लगेज जाँच गर्ने क्रममा सुन भेटिएको हो।

त्रिभुवन विमानस्थल भन्सार कार्यालयका अनुसार सुमनले ल्याएको लगेजमा नाबालकले लगाउने ५ थान सिंगल पिस पोशाकको टाँकभित्र ६० वटा सुनका रिङ भेटिएको हो।

भन्सार कार्यालयले सुनसहित यात्रुलाई नियन्त्रणमा लिएको छ। बरामद सुनको तौल करिब १२५ ग्राम रहेको छ।

पक्राउ परेका सुमन भिजिट भिसामा दुबई गएको र काम गर्ने अवसर नपाएर नेपाल फर्किएको बताइएको छ। दुबई एयरपोर्टमा अपरिचित व्यक्तिले बच्चाका लागि उपहारस्वरुप ती कपडा नेपालसम्म पुर्‍याइदिन अनुरोध गरेकोले बोकेर आएको बयान सुमनले दिएका छन्। 

भन्सार कार्यालयले बारम्बार विदेशबाट नेपाल आउने यात्रुहरुलाई अरुको सामान नल्याउन आग्रह गर्दै आएको छ।