राप्रपाले भंग गर्‍यो एकता वार्ता समिति

काठमाडौं- राष्ट्रिय प्रजातन्त्र पार्टी (राप्रपा) ले महामन्त्री धवलशमशेर राणाको नेतृत्वमा गठन गरेको वार्ता समिति भंग गरेको छ।

राप्रपा महामन्त्री राणाको नेतृत्वमा गत मंसिरमा वार्ता समिति गठन भएको थियो।

राजेन्द्र लिङ्देन महाधिवेशनबाट राप्रपा अध्यक्षमा निर्वाचित भएपछि बसेको पहिलो केन्द्रीय समिति बैठकले महामन्त्री राणाको नेतृत्वमा वार्ता समिति गठन गरेको थियो।

वार्ता समितिलाई समान विचारधारा भएका व्यक्ति, समूह, संस्था, संगठन, पार्टी र धार्मिक क्षेत्रसँग एकता र सहकार्य गर्ने जिम्मेवारी केन्द्रीय समितिले दिएको थियो।

वार्ता समितिमा महामन्त्री राणा, ऋषिबाबु परियार, दिलविकास राजभण्डारी, पुष्पराज पुरुष थिए।

समितिले विभिन्न पार्टी र व्यक्ति तथा समूहसँग वार्ता र संवाद गरेर राप्रपामा समाहित पनि गरेको थियो।

तत्कालका लागि वार्ता र संवादका काम सकिएकाले वार्ता टोली भंग गरिएको राप्रपाले जनाएको छ।