युवामैत्री स्थानीय शासन बनाउन प्रतिबद्धता

बुटवल- रुपन्देहीको तिलोत्तमा नगरपालिकालाई युवामैत्री स्थानीय तह घोषणाका लागि कार्ययोजना बनाउन प्रतिबद्धता गरिएको छ। युवामैत्री स्थानीय शासन अभियानलाई ठोस रुप दिन जनप्रतिनिधि र युवाहरुको लागि क्षमताअभिवृद्धि कार्यक्रमको समापनमा ७ बुँदे प्रतिबद्धतापत्र सार्वजनिक गरिएको हो।

दुई महिनाभित्र युवामैत्री स्थानीय शासनको अवलम्बन तथा कार्यान्वयनका लागि वर्तमान अवस्था विश्लेषण तथा आगामी पाँच वर्षको मार्गदर्शन तयार गर्ने, नगरपालिकाका जनप्रतिनिधिहरु, विषयगत शाखा, कर्मचारी र बहुसरोकारवालाहरुसँग नियमित अन्तरक्रिया, छलफल र अभिमुखीकरणलाई निरन्तरता दिन कार्यक्रममा सहभागीहरुले प्रतिबद्धता जनाएका छन्।

तिलोत्तमा नगरपालिकामा रहेका विभिन्‍न विषयगत, विकास र अभियानसँग सम्बन्धित संरचनाहरुमा युवाहरुको अर्थपूर्ण र समान सहभगिता  प्रभावकारी बनाउन सामूक पहल गर्ने तथा युवाहरुको खेलकुद, स्वास्थ्य, शिक्षा, अनलाइन सुरक्षा , लागुपदार्थ दुर्व्यसनी, इत्यादी सवालहरुमा आआफ्नो ठाउँबाट सचेतना वृद्धि गर्ने समेत प्रतिबद्धतामा उल्लेख गरिएको छ। तिलोत्तमा नगरपालिकामा युवामैत्री स्थानीय शासनका ७ रणनीति, ४६ कार्यनीति, ४५ सुचकहरुको स्थानीयकरण गर्र्दै ४ चरणहरुका आधारमा क्रमश युवामैत्री स्थानीय शासन बनाउने गरि प्रतिबद्धता तयार पारिएको जागृति बाल तथा युवा सरोकार नेपालका अध्यक्ष तिलोत्तम पौडेलले जानकारी दिए।

युवामैत्री स्थानीय शासनको आवश्यकता र यसले समग्र विकासमा पार्ने सकारात्मक प्रभावलाई मध्यनजर गर्दै तिलोत्तमा नगरपालिकाको संयोजन, राष्ट्रिय युवा परिषद्, जागृति बाल तथा युवा सरोकार नेपाल, युएनडीपी र युनिसेफ नेपालको संयुक्त आयोजनामा शुक्रबारदेखि आइतबारसम्म युवामैत्री स्थानीय शासन सम्बन्धी क्षमता अभिवृद्धि कार्यक्रममा यस्तो प्रतिबद्धता गरिएको हो। तिलोत्तमा नगरपालिकालाई युवामैत्री स्थानीय शासन बनाउनका लागि जनप्रतिनिधि र कर्मचारी प्रशासनले समेत प्रतिबद्धता जनाएका छन।

तिलोत्तमाका प्रमुख प्रशासकीय अधिकृत जिवन ज्ञवालीले स्थानीय तहहरुले अब आफूलाई युवामैत्री स्थानीय शासन बनाउनुपर्ने बताए। उनले प्रतिबद्धता जनाएपनि नजनाएपनि स्थानीय तहहरुले आफूलाई त्यहाँ पुर्‍याउनैपर्ने बताए।

युवाको अधिकारलाई सुनिश्चित गर्न स्थानीय तहदेखि नै युवाका सवालहरु शासन प्रणालीमा जोड्दै, उनीहरुको सक्रिय सहभागिता, संलग्नता र सहकार्यमा संचालन गरिने शासन प्रणाली युवामैत्री स्थानीय शासन बनाउनका लागि कार्यक्रम शुरु गरिएको तिलोत्तमा नगरपालिकाका कार्यपालिका सदस्य तथा सामाविक विकास सभापती रवि सेन्चुरीले बताए। उनले तिलोत्तमा नगरपालिकाले युवामैत्री स्थानीय शासनका रुपमा आफूलाई स्थापित गर्ने गरि काम थाल्ने बताए।

राष्ट्रिय युवा परिषदसँग सहकार्य गरेर नेपालमा ७ वटा प्रदेशका ७ स्थानीय तहलाई नमूनाका रुपमा पहिलो चरणमा युवामैत्री स्थानीय शासन घोषणा गर्ने गरि अभियान शुरुवात भएको छ।  राष्ट्रिय युवा नीतिले १६ देखि ४० बर्ष उमेर समुहका नागरिकहरुलाई युवाको परिभाषामा समेटेको छ।