पञ्चदेवलकी मेयर चलाउने प्रहरी नियन्त्रणमा

अछाम- अछामको पञ्चदेवल विनायक नगरपालिकाकी मेयर अम्बिका चलाउने पक्राउ परेकी छन्।  पञ्चदेवल विनायक नगरपालिका-४ का १५ वर्षका विनोद शाहीको मृत्यु प्रकरणमा आरोपित नवनिर्वाचित मेयर चलाउनेलाई  प्रहरीले नियन्त्रणमा लिएको हो।

मेयर चलाउने शनिबार आफैँ प्रहरी कार्यालय पुगेको अछाम जिल्ला प्रहरी कार्यालयका प्रमुख एवम् प्रहरी नायब उपरीक्षक (डीएसपी) नारायण डाँगीले जानकारी दिए। उक्त घटनाका विषयमा हालसम्म ७ जना पक्राउ परेका छन्। 

वैशाख १७ गते बेपत्ता भएका पञ्चदेवल विनायक नगरपालिकाका शाहीको शव २० गते भेटिएको थियो। जेठ २६ गते शाहीका परिवार र आफन्तले नवनिर्वाचित मेयर चलाउनेसहित १३ जनाविरुद्ध किटानी जाहेरी दिएका थिए। 

नेकपा एमालेले शाहीको हत्या प्रहरी प्रशासनको बलमा नेपाली कांग्रेसका कार्यकर्ताबाट भएको आरोप लगाउँदै आएको छ। तर कांग्रेसले भने उक्त आरोपको खण्डन गर्दै आएको छ।