काठमाडौं– मिटरब्याजीको दबाबका कारण विष सेवन गरी आत्महत्या गरे बाराको महागढीमाई नगरपालिका वडा नम्बर–४ दहियारका इन्जिनियर प्रभात जैसवालले। उनले आत्महत्या गरेको दुई महिना बितिसकेको छ।
पर्साको बहुअर्वामा डिस्टिलरी कम्पनी सञ्चालन गरिरहेका जैसवाल गत ९ जेठमा आफ्नै घरमा मृत भेटिएका थिए।
उनको अन्त्येष्टिपछि घर सफा गर्ने क्रममा उनको पर्समा सुसाइड नोट भेटिएको थियो। उक्त नोटमा आठ जना मिटरब्याजीको नाम र फोन नम्बर पनि उल्लेख छ। नोटमा लेखिएको छ, ‘‘मिटरब्याज तिर्न नसकेपछि अप्रिय निर्णय लिन बाध्य भएँ।’ मृतकले आफूलाई आठ जना मिटरब्याजीले दुःख दिएको भन्दै उनीहरूको नामसमेत उक्त नोटमा लेखेका छन्।
प्रभातको मृत्युपछि परिवारले सुसाइड नोटमा नाम उल्लेख भएका व्यक्तिहरुविद्ध प्रहरीमा जाहेरी दिन खोज्यो। तर, प्रहरीले भने जाहेरी लिन नमानेर उल्टैपीडा थपेको परिवारको गुनासो छ।
परिवारले जेठ ३० गतेदेखि जाहेरी दर्ताका लागि प्रयास गरेको भए पनि अहिलेसम्म जाहेरी दर्ता भएको छैन। प्रहरीले सुसाइड नोटमा नाम उल्लेख भएका पीडकसँग लेनदेन गरी जाहेरी दर्ता नगरेको आशंका आफन्तको छ।
मिटरब्याजीविरुद्ध परिवारले आत्महत्या दुरुत्साहनको कसुरमा जाहेरी लिएर प्रहरीसमक्ष गएका थिए। जिप्रका बाराले भने मृतकको १० पृष्ठ लामो अर्को लिखतसँग सुसाइड नोटको अक्षर तुलना गर्नुपर्ने बताएर जाहेरी दर्ता नगरेको परिवारका सदस्यको भनाइ छ। चिठी र मृतकको हस्ताक्षर परीक्षणका लागि विधिविज्ञान प्रयोगशालामा पठाइएको र हस्ताक्षर मिलेर आए मुद्दा दर्ता गरिने प्रहरीले बताएको छ। सुसाइड नोट अन्त्येष्टिपछि भेटिएको थियो।