प्रदेश सांसद खातुनको राजीनामा स्वीकृत, ११ महिना जेल बस्नुपर्ने

विराटनगर– प्रदेश १ नेकपा एमालेकी सांसद गुलेफुन खातुनले पदबाट दिएको राजीनामा स्वीकृत भएको छ। सरकारी छाप र  दस्तखत किर्ते गरेको अभियोग प्रमाणित भएपछि नेकपा एमालेबाट समानुपातिक सांसद बनेकी खातुनले बुधबार राजीनामा दिएकी थिइन्।

खातुनले दिएको राजीनामा बिहीबारको प्रदेशसभा बैठकमा बाचन गरिएको थियो। खातुनको मुद्दा दोहोर्याउने आदेश दिन सर्वोच्च अदालतले अस्वीकार गरेपछि उनले राजीनामा दिएकी हुन्।  

खातुनले सरकारी छाप किर्ते गरेको आरोप लागेको थियो। किर्ते मुद्दामा जिल्ला अदालत मोरङले २०७४ वैशाख ३१ गते एक वर्ष कैद सजाय सुनाएको थियो।

जिल्लाको फैसला विरुद्ध खातुन २०७४ भदौमा उच्च अदालत विराटनगर गएकी थिइन्। २०७६ पुस ६ गते उच्चले उनलाई एक वर्ष कैद र १४ हजार ५ सय ८३ रुपैयाँ जरिवानाको फैसला सुनाएको थियो।  

उच्चको फैसला विरुद्ध खातुनले २०७६ फागुन ११ गते सर्बोच्चमा निवेदन दिएकी थिइन्। सर्बोच्चले सुनुवाइका लागि निस्सा दिएन। खातुन अब ११ महिना ५ दिन कैद बस्नुपर्नेछ।