विराटनगरले ल्यायो ३ अर्ब ६२ करोडको बजेट, चालू आवभन्दा १ अर्ब कम

विराटनगर- विराटनगर महानगरपालिकाले आगामी आर्थिक वर्ष २०७९/८० को लागि ३ अर्ब ६२ करोड ५५ लाख रुपैयाँको बजेट सार्वजनिक गरेको छ। महानगर उपप्रमुख शिल्पा निराला कार्कीले शुक्रबार महानगरको १०औं नगरसभामा आगामी आर्थिक वर्षको नीति तथा कार्यक्रम र बजेट प्रस्तुत गरेकी हुन्। आगामी आवको बजेट चालु आवको भन्दा १ अर्बले कम हो।

विराटनगरले पूर्वाधार विकासलाई प्राथमिकतामा राखेको छ। पूर्वाधारमा १ अर्ब ८९ करोड ७१ लाख १७ हजार बजेट विनियोजन गरेको विवराटनले कार्यालय सञ्चालन तथा प्रशासनिक खर्चमा ५५ करोड ३५ लाख ५० हजार विनियोजन गरेको छ। आर्थिक विकासका लागि २७ करोड ७३ लाख छुट्याउँदा सामाजिक विकासमा ७८ करोड ३९ लाख भाग लगाइएको छ।  वातावरण तथा विपद व्यवस्थापन गर्न विराटनगरे ३ करोड ६० लाख खर्च गर्ने योजना बनाएको छ। 

वडास्तरीय योजनाका लागि ४२ करोड ६८ लाख १७ हजार विनियोजन गर्दा नगर स्तरीय आयोजनाका लागि ३० करोड खर्च गर्ने विराटनगरको योजना छ। 

महानगरले संघीय सरकार अन्तर सरकारी वित्तीय हस्तान्तरणबाट १ अर्ब २१ करोड ८५ लाख, प्रदेश सरकारबाट ४ करोड ९१ लाख ९७ हजार, राजश्व बाँडफाँटबाट १ अर्ब १३ करोड ९९ लाख ७० हजार, आन्तरिक आय १ अर्ब जुटाउने विराटनगरको लक्ष्य छ। यस्तै जनसहभागिताबाट ८ करोड, अनुदान तथा ऋणबाट १० करोड १९ लाख र संघ सस्थाबाट ३ करोड ६० लाख अनुमान गरिएको छ।