भरतपुरले ल्यायो पौने ६ अर्बको बजेट, फोहोर व्यवस्थापनमा काठमाडौंकै मोडल

काठमाडौं– चितवनको भरतपुर महानगरपालिकाको ११औं अधिवेशन तथा नगरसभा शुक्रबारबाट सुरू भएको छ। नगरसभामा मेयर रेनु दाहालले आउँदो आर्थिक वर्षको नीति तथा कार्यक्रम र उपमेयर चित्रसेन अधिकारीले बजेट पेस गरेका छन्। 

आर्थिक वर्ष २०७९–८० का लागि महानगरले ५ अर्ब ७४ करोड ४२ लाख ५६ हजार रुपैयाँ प्रस्ताव गरेको छ। यसको स्रोतको रुपमा आन्तरिक आय १ अर्ब ५० करोड रुपैयाँ रहने छ। त्यसैगरी विकास निर्माणका लागि जनसहभागितामार्फत ३६ करोड रुपैयाँ जुटाइने बजेट वक्तव्यमा उल्लेख छ। चालू आर्थिक वर्षमा महानगरको बजेट ५ अर्ब ५१ करोड रुपैयाँ छ। 

महानगरले कृषि एम्बुलेन्सको व्यवस्था गर्ने पनि नीति तथा कार्यक्रममा उल्लेख छ। अबदेखि फोहोर व्यवस्थापनका लागि घरघरमै कुहिने र नकुहिने फोहोर छुट्याएर संकलन गरिने पनि मेयर दाहालले बताइन्। 

महानगरमा तत्काल तीनवटा रुटमा विद्युतीय बस चलाउने, भरतपुरदेखि देवघाटधामसम्म जेष्ठ नागरिकका लागि विद्युतीय बस चलाउने दाहालले बताइन्। 

२०८० साललाई भरतपुर भ्रमण वर्ष घोषणा गरेर पर्यटन प्रवर्धन गर्ने योजना पनि दाहालले सुनाइन्।