धनगढी उपमहानगरको बजेट एक अर्ब ८२ करोड

धनगढी- सुदूरपश्चिम प्रदेशको एक मात्र उपमहानगरपालिका, प्रदेशको अस्थायी मुकामसमेत रहेको धनगढीले आगामी आर्थिक वर्षका लागि एक अर्ब ८२ करोडको हाराहारीमा बजेट ल्याउने तयारी गरेको छ।

आज आठौं नगर सभामा पेस हुने धनगढी उपमहानगरपालिकाको बजेटको आकार आगामी आर्थिक वर्ष २०७९/८० का लागि एक अर्ब ८२ करोडको हाराहारीमा प्रस्तुत हुने जनाइएको छ।

उपमहानगरपालिकाले चालु आर्थिक वर्ष २०७८/७९ मा एक अर्ब ८१ करोड २८ लाख २२ हजार एक सय रुपैयाँ बराबरको बजेट प्रस्तुत गरेको थियो। आज उपप्रमुख कन्दकला रानाले सभामा बजेट प्रस्तुत गर्ने जनाइएको छ। 

यसअघि धनगढी उपमहानगरपालिकाका नगर प्रमुख गोपाल हमालले सार्वजनिक जग्गा, खोलानाला, नदी अतिक्रमणलाई नियन्त्रण गर्दै अतिक्रमण व्यवस्थापन तथा व्यवस्थित बस्ती विकासलाई प्राथमिकता राखी आगामी आर्थिक वर्षको नीति तथा कार्यक्रम प्रस्तुत गरेका थिए।

नगर प्रमुख हमालले जनस्वास्थ्य, सरसफाइ तथा मानव सामर्थ्य विस्तार, कृषि तथा पशुपन्छी उत्पादन, उत्पादकत्व अभिवृद्धि, बजारीकरण तथा व्यवसायीकरण, गुणस्तरीय शिक्षा, युवा, खेलकुद तथा रोजगारी, प्रतिफलदायी दिगो पूर्वाधार निर्माण तथा सन्तुलित विकास, आर्थिक विकास तथा राजश्व परिचालन, सूचना प्रविधि तथा सञ्चार विकास, उद्यम, स्वरोजगार र सहकारिता विकास, प्रशासनिक पुनर्संरचना तथा संस्थागत सुशासन, भाषा, संस्कृति, कला, साहित्यको संरक्षण, प्रवर्द्धन र विकास, वन तथा वातावरण संरक्षण एवं सामुदायिक वनको दिगो प्रयोग प्राथमिकताका क्षेत्र रहेको भन्दै नीति तथा कार्यक्रम प्रस्तुत गरेका थिए।